ශ්‍රී ලංකා ක්‍රිකට් ආයතනයේ සංවිධානයෙන් තෙවැනි වතාවටත් ක්‍රියාත්මක නැෂනල් සුපර් ලීග් සිව්දින ක්‍රිකට් තරගාවලියේ දෙවැනි සතියේ පැවැත්වෙන දඹුල්ල සහ ගාල්ල අතර තරගයේදී ලකුණු 251ක ජයග්‍රාහී ඉලක්කයක් හඹායන දඹුල්ල පිලේ කඩුලු 4ක් ලකුණු 3කට බිඳ දැමූ දුනිත් වෙල්ලාලගේ එල්ල කළ ප්‍රබල පීඩනය හමුවේ තෙවැනි දිනය නිමාවෙද්දී දඹුල්ල දෙවැනි ඉනිම කඩුලු 6ක් දැවී ලකුණු 27ක් ලබා සිටියේය. දුනිත් සමඟ අනෙක් අන්තයෙන් පන්දු යැවූ දිලුම් සුධීර ලකුණු 10කට කඩුලු 2ක් බිඳ හෙලීම දඹුලු පිතිකරුවන් අසීරුතාවට ලක් කිරීමට තවත් හේතුවකි.

පළමුව පන්දුවට පහර දුන් සත්කාරක ගාල්ල කණ්ඩායම සියලු දෙනා දැවී ලකුණු 267ක් ලබාගත් අතර, දඹුල්ල කණ්ඩායම පිළිතුරු ලෙස පළමු ඉනිමට ලකුණු 261ක් ලබා ගත්තේය. ගාල්ල දෙවැනි ඉනිම ලකුණු 244කට සීමාවීමෙන් දඹුල්ලට එල්ලවූ ඉලක්කය ලකුණු 251කි. දඹුල්ල දෙවැනි ඉනිමේදී ආරම්භක පිතිකරුවන් වූ නිශාන් මධුෂ්ක හා රොන් චන්ද්‍රගුප්ත එක්ව පන්දු 18කදී ලකුණු 11ක් ලබා ගැනීම හොඳම සබඳතාව වූ අතර, නායක ධනංජය ද සිල්වා, පවන් රත්නායක හා සොනාල් දිනූෂ ලකුණු නොලබාම දැවී ගියහ.

ගාල්ල ජාත්‍යන්තර ක්‍රීඩාංගණයේ පැවැත්වෙන මෙම තරගයේදී දඹුල්ල පිලට ක්‍රීඩා කරන ශ්‍රී ලංකා ටෙස්ට් ක්‍රිකට් නායක ධනංජය ද සිල්වා පළමු ඉනිමේදී පන්දු 155කදී හතරේ 14ක් සමඟ ලකුණු 106ක් ලබා ගැනීමට සමත් වුවද දෙවැනි ඉනිමේ අසාර්ථකවීම බලවත් පාඩුවක් විය.

ගාල්ල පිලේ පන්දු යවන්නන් අතර ඉදිරියෙන් සිටි මිලාන් රත්නායක ලකුණු 38කට කඩුලු 4ක් බිඳහෙළූ අතර, ඩිල්ෂාන් මධුසංඛ ලකුණු 64කට කඩුලු 3ක් හා දිලුම් සුධීර ලකුණු 49කට කඩුලු 2ක් බිඳහෙලා ගත්හ.

ගාල්ල වෙනුවෙන් සාර්ථක පිතිහරඹයක නිරත වුණු ඔෂද ප්‍රනාන්දු පන්දු 163 කට මුහුණ දෙමින් හතරේ පහර 8 ක් සහ හයේ පහර 2 ක් සමගින් ලකුණු 100 ක් ලබා ගත් අතර, දිනේෂ් චන්දිමාල් පන්දු 124කදී හයේ පහර 2ක් හා හතරේ පහර 6ක් සමඟ ලකුණු 73ක් ලබා ගත්තේය. විශිෂ්ට පන්දු යැවීමක නිරත වූ අකිල ධනංජය ලකුණු 83කට ගාල්ල පිලේ කඩුලු 7ක් බිඳහෙලා ගත්තේය.

ගාල්ල පළමු ඉනිම සියලු දෙනා දැවී ලකුණු 267 (ඕවර් 74)
(ඕෂද ප්‍රනාන්දු 100, දිනේෂ් චන්දිමාල් 73, අවිශ්ක පෙරේරා 29 ( අසිත ප්‍රනාන්දු 37/2, අකිල ධනංජය 83/7)

දඹුල්ල පළමු ඉනිම සියලු දෙනා දැවී ලකුණු 261 (ඕවර් 74.2)
නිශාන් මධුෂ්ක 15, සහන් කෝසල 19, ධනංජය ද සිල්වා 106, සොනාල් දිනූෂ 39, ලසිත් ඇඹුල්දෙනිය 54 (දිල්ෂාන් මධුසංඛ 64/3, මිලාන් රත්නායක 38/4, දිලුම් සුධීර 49/2)

ගාල්ල දෙවැනි ඉනිම සියලු දෙනා දැවී ලකුණු 244 (ඕවර් 64.4)
(ඕෂද ප්‍රනාන්දු 44, නිපුන් ධනංජය 27, දිනේෂ් චන්දිමාල් 23, දුනිත් වෙල්ලාලගේ 46, අවිශ්ක පෙරේරා 16, රමේෂ් මෙන්ඩිස් 56, මිලාන් රත්නායක 13 (ලසිත් ඇඹුල්දෙනිය 78/3, අකිල ධනංජය 80/5)

දඹුල්ල දෙවැනි ඉනිම කඩුලු 6ක් දැවී ලකුණු 27 (ඕවර් 8.2)
සහන් කෝසල නොදැවී 5 (දිලුම් සුධීර 10/2, දුනිත් වෙල්ලාලගේ 3/4)