පාකිස්තානයේ රැදී සිටින මුළු කාල සීමාවේදී ශ්‍රී ලංකා කණ්ඩායමට උපරිම ආරක්ෂක විධි විධාන ලබා දෙන බවට පාකිස්තානු රජය ලබා දී තිබෙන සහතිකය අනුව සැලසුම් කළ පරිදිම ශ්‍රී ලංකා ක්‍රිකට් කණ්ඩායම පාකිස්තානු තරග සංචාරයට සහභාගිකරවීමට ශ්‍රී ලංකා ක්‍රිකට් ආයතනය තීරණය කර තිබේ.
ශ්‍රී ලංකා කණ්ඩායම පාකිස්තානය තුළ රැඳී සිටික කාල සීමාවේදී කිසිදු ත්‍රස්තවාදී තර්ජනයක් තිබෙන බවට කිසිදු බුද්ධි අංශයකින් තොරතුරු අනාවරණය වී නොමැති බවට ආරක්ෂක ලේකම්වරයා වෙනුවට කටයුතු කරන ජාතික බුද්ධි අංශ ප්‍රධානී විශ්‍රාමික මේජර් ජනරාල් ජේ. ආර්. කුලතුංග මහතා විසින් නිල වශයෙන් දැනුම් දීමෙන් පසු ශ්‍රී ලංකා ක්‍රිකට් බලධාරීහු ඉහත තීරණය ගෙන තිබේ.
අදාළ තරග සංචාරය යටතේ ශ්‍රී ලංකා ක්‍රිකට් කණ්ඩායම ඉලක්ක කර ගනිමින් ප්‍රහාරයක් එල්ල වන බවට වූ කිසිදු තොරතුරක් එරට මහකොමසාරිස් කාර්යාලයට කිසිදු තොරතුරක් ලැබී නොමැති බවද එම ලිපියෙන් වැඩිදුරටත් කරුණු දක්වා තිබේ.
මේ අතර අදාළ තරග සංචාරයට ලබා දෙන ආරක්ෂාව සම්බන්ධව කරුණු දක්වමින් පාකිස්තානු රජය විසින්ද විදුලි සංදේශ, විදේශ රැකියා සහ ක්‍රීඩා අමාත්‍යාංශය හරහා ශ්‍රී ලංකා ක්‍රිකට් ආයතනයට ලිපියක් යොමු කරමින් පහත සඳහන් ආරක්ෂාවක් ලබා දෙන බවට සහතික කර තිබේ.
- ශ්‍රී ලංකා කණ්ඩායමේ ආරක්ෂාව සම්බන්ධයෙන් පාකිස්තානු රජය විසින් ඉතාඉහළ සැලකිල්ලක් දක්වන බව.
- ආරක්ෂාව සම්බන්ධ සියළු සම්බන්ධීකරණ කටයුතු පාකිස්තානු හමුදාව විසින් සිදු කරන බව.
- රාජ්‍ය නායකයකුට ලබා දෙන ආරක්ෂාව හා සමාන ආරක්ෂාවක් ශ්‍රී ලංකා ක්‍රිකට් කණ්ඩායම සඳහා පාකිස්තානු රය විසින් ලබා දීම.
ඒ අනුව ශ්‍රී ලංකා ක්‍රිකට් කණ්ඩායමේ පාකිස්තානු තරග සංචාරය යොදා ගත් පරිදිම ලබන අගෝස්තු 27 වැනිදා ආරම්භ වනු ඇත. උක්ත සංචාරය සඳහා වන අනුමැතිය ඉකුත් අගෝස්තු 22 වැනිදා සහ සැප්තැම්බර් 16 වැනි දිනයන්හි රැස් වුණු ශ්‍රී ලංකා ක්‍රිකට් විධායක කමිටු රැස්වීමේදී ලබා දී තිබේ.
සති 2 කට ආසන්න කාලයක් පුරා විහිදෙන මෙම තරග සංචාරයේදී ශ්‍රී ලංකා පිල කරච්චි නුවරදී එක්දින තරග 3 කටද ලාහෝර්හිදී විස්සයි-20 තරග 3 කටද සහභාගිවීමට නියමිතය. ශ්‍රී ලංකා ක්‍රිකට් කණ්ඩායම ලබන 24 වැනිදා පාකිස්තානය බලා පිටත්ව යෑමට නියමිතය.
