ජාත්‍යන්තර ක්‍රිකට් සභාව විසින් පවත්වනු ලබන තුන්වැනි අදියරේ (Level 3) පුහුණු පාඨමාලාවක සම්පත් දායකත්ව මණ්ඩලයේ කටයුතු කිරීම වෙනුවෙන් ශ්‍රී ලාංකික පුහුණුකරුවන් දෙපළක් වන හේෂාන් ද මෙල් සහ තාරක සමරතුංග යන මහත්වරුන් දෙදෙනා හට ජාත්‍යන්තර ක්‍රිකට් සභාව විසින් ආරාධනා කර තිබේ.
ජාත්‍යන්තර ක්‍රිකට් සභාවේ පුහුණුකරුවන්ගේ අධ්‍යාපන ඒකකය විසින් පවත්වනු ලබන මෙම පාඨමාලාව නොවැම්බර් මස 01 වැනිදා එක්සත් අරාබි එමීර් රාජ්‍යයේ ඩුබායි නුවරදී ආරම්භවිය. මෙම මස 06 වැනිදා දක්වා පැවැත්වෙන මෙම පාඨමාලාවේදී හේෂාන් ද මෙල් මහතා, උපදේශකයකු මෙන්ම සමස්ථ වැඩසටහනේම අධීක්ෂණ පුහුණුකරුවකු ලෙස කටයුතු කරනු ඇත. ශ්‍රී ලංකාව නියෝජනය කරමින් මෙම වැඩසටහනට සහභාගිවී සිටින තාරක සමරතුරංග මහතා ‘මානසික කුසලතා’ වැඩිදියුණු කිරීම පිළිබඳව උපදේශකයකු ලෙස කටයුතු කරනු ඇත.
ශ්‍රී ලංකා ක්‍රිකට් පුහුණු අධ්‍යාපන ඒකකයේ ප්‍රධානියා ලෙසින් කටයුතු කරන හේෂාන් ද මෙල් මහතා, ක්‍රිකට් ඔස්ට්‍රේලියා විසින් පවත්වන ලද පළමු සහ දෙවැනි අදියරේ පුහුණුකරුවකු ලෙසද ආසියානු ක්‍රිකට් කවුන්සිලය විසින් පවත්වන ලද තෙවැනි අදියරේ පුහුණුකරුවකු ලෙසද සුදුසුකම් ලබා සිටියි. මීට අමතරව ඔහු ක්‍රිකට් ඔස්ට්‍රේලියානු අධ්‍යාපන අංශයේ පළමු සහ දෙවැනි ශ්‍රේණි සමත් පුහුණුකරුවක්ද වන්නේය.
ඔහු සමඟ මෙම කර්තව්‍යයට දායක වී සිටින අනෙක් ශ්‍රී ලාංකිකයා වන සමරතුංග මහතා, ජාත්‍යන්තර ක්‍රිකට් සභාව විසින් පවත්වන ලද පළමු, දෙවැනි සහ තෙවැනි ශ්‍රේණිවල පුහුණුකරුවකු ලෙස සුදුසුකම් ලබා සිටින අතර ඊට අමතරව ක්‍රිකට් ඔස්ට්‍රේලියා විසින් පවත්වන ලද දෙවැනි අදියරේ පුහුණුකරුවකු ලෙසද සුදුසුකම් ලබා සිටියි.
තමන්ට ලැබුණු මේ වටිනා අවස්ථාව පිළිබඳව අදහස් දක්වා සිටින හේෂාන් ද මෙල් මහතා, මෙවැනි අවස්ථාවක් හිමිවීම තුළින් ශ්‍රී ලංකා ක්‍රිකට් පුහුණු අධ්‍යාපන ඒකකයේ ගුණාත්මක භාවය පැහැදිළිවම පෙන්නුම් කරන බව සඳහන් කර සිටියි. මේ අතර සමරතුංග මහතා අදහස් දක්වමින්, මෙම වැඩසටහනෙහි කොටස්කරුවකු වීම හරහා පාඨමාලාව සඳහා සහභාගිවන්නන්ට තම උපරිමයම ලබාදීමට බලාපොරොත්තු වන බව සඳහන් කර සිටියි.
මෙම පාඨමාලාව සඳහා ඔස්ට්‍රේලියාව, එංගලන්තය, ඉන්දියාව, පාකිස්තානය, සිම්බාබ්වේ, ඇමරිකා එක්සත් ජනපදය, උගන්ඩාව, එක්සත් අරාබි එමීර්, කටාර් සහ සෞදි අරාබි යන රටවල් නියෝජනය කරමින් පුහුණුකරුවෝ සහභාගිවෙති.
