Chamila Karawita reporting from Rawalpindi
පාකිස්තානය සමඟ රාවල්පිණ්ඩි නුවර පැවැති පළමු ටෙස්ට් තරගය අතරතුරදී ශ්‍රී ලංකා කණ්ඩායමේ වේග පන්දු යවන කසුන් රජිත ආබාධයකට ලක්ව තිබෙන බැවින් ලබන 19 වැනිදා කරච්චිහිදී ආරම්භ වීමට නියමිත දෙවැනි ටෙස්ට් තරගයට ක්‍රීඩා කිරීම අවිනිශ්චිත තත්ත්වයක පවතියි.
වර්ෂාවෙන් බාධා ඇතිවීම නිසා පළමු ඉනිමට පමණක් සීමා වුණු පළමු ටෙස්ට් තරගයේ පන්දු යවන අතරතුරදී කසුන් මස් පිඬු ඉරී යෑමේ ආබාධයකට මුහුණ දී තිබේ. ශ්‍රී ලංකාවේ ආරම්භක පන්දු යවන්නා ලෙසින් කටයුතු කරන ලද කසුන් රජිත තරගයේ පස්වැනි සහ අවසන් දිනයේදී එක දිගට පන්දු වාර 6 ක් ක්‍රියාත්මක කළේය. එහිදී නිලකුණු පන්දුවාර 2 ක්ද සමඟ ලකුණු 05 කට කඩුල්ලක් දවා ගත් කසුන් අනතුරුව පාකිස්තානය ක්‍රීඩා කරන ලද පන්දුවාර 70 ඇතුළත එකම අවස්ථාවක හෝ පන්දු යැවීමෙන් වැළකී සිටියේය.
මේ පිළිබඳව ශ්‍රී ලංකා ක්‍රිකට් වෙත අදහස් දක්වා සිටි කණ්ඩායම් කළමනාකරු අසන්ත ද මෙල් මහතා, ඉදිරි ටෙස්ට් තරගයට ක්‍රීඩා කිරීමේ අවස්ථාව කසුන්ට බොහෝ විට අහිමිවනු ඇති බව තමා විශ්වාස කරන බව පැවැසීය. මෙහිදී කසුන් බොහෝ විට ශ්‍රී ලංකාව බලා පිටත්ව යෑමට නියමිත බවද කළමනාකරු වැඩිදුරටත් ප්‍රකාශ කර සිටියේය.
කෙසේ වෙතත් කසුන්ගේ ස්ථානය සඳහා ආදේශ කරන්නේ කවුරුන්ද යන්න මේ වන තෙක් තීරණයකට එළැඹ නැති බවද තේරීම් කමිටු සභාපතිවරයා වශයෙන්ද කටයුතු කරන ද මෙල් මහතා අවධාරණය කර සිටියේය. ශ්‍රී ලංකාව පළමු ඉනිම වෙනුවෙන් කඩුලු 6 ක් දැවී ලබා ගත් ලකුණු 308 පිළිතුරු ඉනිම ක්‍රීඩා කළ පාකිස්තානු කණ්ඩායම ජය පැරදුමෙන් තොරව අවසන් වන විට කඩුලු 2 කට ලකුණු 252 ක් ලබා සිටියේය.
