Chamila Karawita reporting from Galle

දශක ගණනාවකට හිමිකම් කියන ටෙස්ට් ක්‍රිකට් ක්‍රීඩාවේ තරග 200 ක තීරකවරයා ලෙසින් කටයුතු කරන ලද පළමු පුද්ගලයා වශයෙන් රංජන් මඩුගල්ල මහතා පත්වුණු ශ්‍රී ලංකාව සහ බටහිර ඉන්දීය කොදෙව් කණ්ඩායම් අතර පළමු ටෙස්ට් තරගයේදී  ඒ මහතාට උපහාර පිදීමට අමතක නොකළ ශ්‍රී ලංකා ක්‍රිකට් ආයතනය සහ අන්තර්ජාතික ක්‍රිකට් කවුන්සිලය තරගාරම්භයට පෙර සුභ පැතුම් එක් කර සිටියහ.

අන්තර්ජාතික ක්‍රිකට් සභාවේ ප්‍රභූ තරග තීරක මඬුල්ලේ ප්‍රධානියා ලෙසින් කටයුතු කරන මඩුගල්ල මහතාට සුභ පැතුම් එක් කිරීම සනිටුහන් කිරීම වෙනුවෙන් ශ්‍රී ලංකා ක්‍රිකට් උප සභාපති ආචාර්යය ජයන්ත ධර්මදාස මහතා සහ ශ්‍රී ලංකා ක්‍රිකට් ප්‍රධාන විධායක නිලධාරී ඈෂ්ලී ද සිල්වා මහතා විසින් විශේෂ සමරු තිළිණ දෙකක් ප්‍රධානය කළහ.

ටෙස්ට් තරග 200 ක්, එක්දින තරග 369 ක සහ විස්සයි-20 තරග 125 ක විනිසුරුවරයා ලෙසින් කටයුතු කර ඇති මඩුගල්ලේ මහතා කාන්තා එක්දින තරග 14 ක් සහ විස්සයි-20 තරග 8 කත් අධීක්ෂණය කර තිබේ.

ශ්‍රී ලංකාව වෙනුවෙන් ටෙස්ට් තරග 18 කට ක්‍රීඩා කර ඇති ඒ මහතා ක්‍රීඩාවට සමුදීමට පෙර ටෙස්ට් තරග 2 කදී ශ්‍රී ලංකාව මෙහෙයවමින් සිව්වැනි ටෙස්ට් නායකයා බවට පත්ව සිටියි. 1993 වසරේදී ජාත්‍යන්තර ක්‍රිකට් කවුන්සිලයේ තරග තීරකවරයකු ලෙස කටයුතු ආරම්භ කර ඇති මඩුගල්ලේ මහතාගේ පළමු පැවරුම වූයේ පාකිස්තානය සහ නවසීලන්තය අතර තරගය වේ. එදා සිට මේ දක්වාම සිය තරග තීරක දිවියේ කටයුතු කල මඩුගල්ලේ මහතා, මේ වන විට අන්තර්ජාතික ක්‍රිකට් සභාව විසින් මෙහෙයවනු ලබන ලෝක කුසලාන තරගාවලි 4 ක (1999, 2003, 2015 සහ 2019), ශූරයන්ගේ කුසලාන තුනක (2004, 2006 සහ 2013), විස්සයි-20 ලෝක කුසලාන තරගාවලි හතරක (2007, 2010, 2016 සහ 2021) අවසන් මහ තරගවල තීරකවරයා ලෙස කටයුතු කර තිබේ.