රංගිරි දඹුල්ල ක්‍රීඩාංගණයේ පැවැත්වෙන දඹුල්ල – ජැෆ්නා තරගයේදී ජැෆ්නා කණ්ඩායමේ ආරම්භක පන්දු යවන නුවන් ප්‍රදීප් ලකුණු 52කට දඹුල්ල පිතිකරුවන් හත්දෙනෙකුම දවාලීම මත දඹුල්ල ප්‍රථම ඉනිම ලකුණු 283කට සීමාවිණි. ප්‍රථම දිනයේ (24) දඹුල්ල කඩුලු 2කට ලකුණු 159ක් රැස්කරමින් ප්‍රබල තත්ත්වයක පසුවූවත් අද දිනයේ ඉතිරි කඩුලු අටම දැවී ඔවුන් ලබාගත්තේ තවත් ලකුණු 124ක් පමණකි.

ප්‍රථම දින නොදැවී ලකුණු 60ක් ලබාසිටි ලසිත් අබේරත්නට සහ නොදැවී ලකුණු 52ක් ලබාසිටි නායක මිනෝද් භානුකට දෙවන දින තවත් එක්කර ගතහැකිවූයේ අඩු ලකුණු සංඛ්‍යාවක්ය. ලසිත් අබේරත්න පන්දු 128කදී හතරේ පහක් සමඟ ලකුණු 68කටද මිනෝද් භානුක පන්දු 112කදී හතරෙ පහක් සමඟ ලකුණු 53ක්ද ලබාසිටියදී මෙදින තරග ආරම්භයේම දැවීගියහ.

මෙදින දස්කම් දැක්වූ දඹුල්ල පිතිකරුවන් වූයේ දුෂාන් හේමන්ත (නොදැවී ලකුණු 63යි) සහ ලකුණු 35ක් රැස්කළ චමිඳු විජේසිංහය. දඹුල්ල හොඳම සබඳතාවයන් වූයේ තෙවන කඩුල්ලට මිනෝද් භානුක සහ ලසිත් අබේරත්න එක්කළ ලකුණු 100 සහ අටවන කඩුල්ලට දුෂාන් හේමන්ත සහ චමිඳු විජේසිංහ රැස්කළ ලකුණු 58ය. ප්‍රබල පන්දු යැවීමක නිරතවූ නුවන් ප්‍රදීප් ලකුණු 52කට කඩුලු හතක් දවාලූවේ පන්දුවාර 21ක් යවමිනි.

දිනය නිමවන විට ජැෆ්නා කිසිවෙකු නොදැවී ලකුණු 45ක් ලබාසිටියේය. මෙහිදී 20 හැවිරිදි නවෝද්‍ය පරණවිතාන නොදැවී ලකුණු 24ක් ලබාසිටීමට සමත්විය.

දඹුල්ල මුල් ඉනිම සියල්ල දැවී 283 (පන්දුවාර 99.5යි) – (ලසිත් අබේරත්න 68, දුෂාන් හේමන්ත 63, මිනෝද් භානුක 53, චමිඳු විජේසිංහ 35, ලියෝ ෆ්‍රැන්සිස්කෝ 24, නිමේෂ් ගුණසිංහ 17, නුවන් ප්‍රදීප් 52/7යි)

ජැෆ්නා පළමු ඉනිම කිසිවකු නොදැවී 45 (පන්දුවාර 18.4යි) – (නවෝද් පරණවිතාන නොදැවී 24, සමඳ ප්‍රනාන්දු නොදැවී 06)