By Chamila Karawita

ශ්‍රී ලංකා කණ්ඩායමේ ඉන්දීය තරග සංචාරය යටතේ බැංගලෝර්හි අද (12 දා) ඇරැඹි දිවා/රාත්‍රී ටෙස්ට් තරගයේදී කඩුලු 16 ක් බිඳ දැමිමට දෙපිළේ පන්දු යවන්නෝ සමත්වූහ. ඉන්දියානු පළමු ඉනිම ලකුණු 252 කට සීමා කිරීමට ශ්‍රී ලංකා පන්දු යවන්නන් සමත්වද්දී හෝරා දෙකකට ආසන්න කාලයක් පන්දුවට පහර දුන් ශ්‍රී ලංකා කණ්ඩායමේ කඩුලු 6 ක් ලකුණු 86 ක් ඇතුළත බිඳ දැමීමට ඉන්දීය පන්දු යවන්නෝ සමත්වූහ. ඒ අනුව ශ්‍රී ලංකා කණ්ඩායම ඉන්දීය පළමු ඉනිමට තවත් ලකුණු 166 ක් පිටුපසින් සිටින්නේ කඩුලු 4 ක් පමණක් අතැතිවය.

ඉන්දීයානු පන්දු යැවීමේ බලපරාක්‍රමය හමුවේ නොසැළී සිටි ඇංජලෝ මැතිව්ස් (43) මෙතෙක් ඉනිමේ ලකුණු ලාභියා බවට පත්වෙද්දී දිනය නිමාවට මිනිත්තු කීපයක් ඇතුළතදී දවා ගැනීමට ජස්ප්‍රිට් බුම්රා සමත්වීමත් සමඟ ශ්‍රී ලංකාව අසීරුවට පත්විය. ඔහු සමඟ පන්දුවට පහර දුන් නම් දැරූ පිතිකරුවන් අතර ඉතිරිව සිටින නිරෝෂන් දික්වැල්ල ලකුණු 13 ක් සහ ලසිත් ඇඹුල්දෙණිය ලකුණු නොලබා කඩුල්ලේ රැඳී සිටිති.

ශ්‍රී ලංකාව පන්දුවට පහර දුන් පන්දුවාර 30 දී එකා පිට එකා කඩුලු දැවී යෑම හැර කැපී පෙනෙන වෙනත් කිසිවක් නොවීය. කාසියේ වාසියත් සමඟ පළමුව පන්දුවට පහර දුන් ඉන්දීය කණ්ඩායම ලකුණු 252 ක් වැනි අඩු ලකුණු සංඛ්‍යාවකට සීමා කිරීමට ශ්‍රී ලංකා පන්දු යවන්නන් සමත්වුවත් ලබාගත් ලකුණු වලින් ලකුණු 148 ක්ම හයේ සහ හතරේ පහර වලින් රැස් කරන ලද ඒවා විය.

ඒ අතරින් ශ්‍රී ලංකාවට වැඩිම හානියක් සිදුකරන ලද්දේ ශ්‍රෙයාස් අයියර් විය. ඉනිමේ වැඩිම ලකුණු ලාභියා වුණු අයියර් ලකුණු 92 ක් ලබා ගත්තේ පන්දු 98 කට මුහුණ දෙමිනි. ළහිරු කුමාර වෙනුවට කණ්ඩායමට කැඳවා සිටින වමත් දඟ පන්දු යවන්නා, ප්‍රවීන් ජයවික්‍රමගේ පන්දුවක් හමුවේ අයියර්ගේ ඉනිම හමාර වන විට හයේ පහර 4 ක් සහ හතරේ පහර 10 ක් ඉනිමට ඇතුළත් කර ගැනීමට සමත්ව සිටියේය.

කඩුලු දවා ගැනීමේදී වමත් දඟ පන්දු යවන්නන් දෙදෙනා වන ජයවික්‍රම සහ ඇඹුල්දෙණිය කඩුලු 3 බැගින් දවා ගනිද්දී ධනංජය ද සිල්වා කඩුලු 2 ක් සහ සුරංග ලක්මාල් එක් කඩුල්ලක් බැගින් දවා ගත්හ. තේ පානයට පෙර රිෂාබ් පාන්ට් විසින් උඩ පන්දුවක් ලබා දුන් නමුත් එය සුරංග ලක්මාල්ට රැක ගැනීමට නොහැකි විය. එසේ වූයේ නම් තේ පානය වන විට ඉන්දීය ඉනිම ලකුණු 93 කට කඩුලු 5 ක් වනු ඇත.

ඉන්දීය ඉනිමේ වටිනාම කඩුල්ල වන හිටපු නායක විරාට් කෝලිගේ කඩුල්ල දවා ගන්නා ලද්දේ ධනංජය ද සිල්වා විසිනි. පා ආවරණයේ වැදුණු පන්දුවට විනිසුරුවරයා ප්‍රතිචාර දැක්වීමත් සමඟ මොහොතක් කෝලි නිරුත්තර වූවේය. ප්‍රධාන විනිසුරුවරයාගේ තීරණයට අභියෝගයක් නෙකරම කෝලි පිටියෙන් ඉවත්වූයේ ලකුණු 23 ක් ලබා සිටියදීය.