ඔස්ට්‍රේලියානු පිලට එරෙහිව පැවැත්වෙන තරග 3 කින් සමන්විත විස්සයි-20 තරගාවලියට නම් කළ කණ්ඩායමේ සිටි වේග පන්දු යවන්නන් දෙදෙනකු වූ කසුන් රාජිත සහ මතීෂ පතිරණ ආබාධවලට ගොදුරුව සිටිති. මේ නිසා ඔවුන් දෙදෙනාටම ජුනි 11 වැනිදා පැවැත්වීමට නියමිත තෙවැනි විස්සයි-20 තරගය අහිමිව තිබේ.

කෙසේ වෙතත් ඒ වෙනුවට අසිත ප්‍රනාන්දු සහ නවක වේග පන්දු යවන්නකු වන ප්‍රමෝද් මදුශාන්ව කණ්ඩායමට එක් කිරීමට ශ්‍රී ලංක ක්‍රිකට් තේරීම් කමිටුව පියවර ගෙන තිබේ. මතීෂ පතිරණගේ දකුණු වැළමිටේ ආබාධයකට ගොදුරුව සිටින අතර රාජිත උකුලේ වම් ස ආශ්‍රිතව ආබාධයකට ගොදුරුව සිටිති. මෙම තත්ත්වය මත ඔවුන් දෙදෙනාවම මේ වන විට ආබාධ සුවකර ගැනීමේ පුනරුත්ථාපනයකට ලක් කිරීමට කණ්ඩායම් කළමනාකාරීත්වය පියවර ගෙන තිබේ.

ඔස්ට්‍රේලියානු ‘ඒ’ පිලට එරෙහිව කොළඹ එස්. එස්.සී. ක්‍රීඩාංගණයේ පැවැති දෙවැනි නිල නොවන එක්දින තරගයට ක්‍රීඩා කළ ප්‍රමෝද් මදුශාන් එම තරගයේදී ලකුණු 50 ට කඩුලු 4 ක් බිඳ හෙළීමට සමත්වූවේය. විස්සයි-20 කණ්ඩායමට එක් කිරීමට පෙර ඔහු ඊට පෙර මාධ්‍ය වෙත මුදාහැරුණු තරග 5 කින් සමන්විත එක්දින තරගාවලිය සඳහා නම් කරන ලද ක්‍රීඩකයින් 21 දෙනෙකුගෙන් සමන්විත ශ්‍රී ලංකා එක්දින කණ්ඩායම සඳහා නම් කර තිබීම විශේෂත්වයකි.