By Chamila Karawita

කුසල් මෙන්ඩිස් විසින් වාර්තා කරන ලද ලකුණු 122 ක වාර්තා ගත ශතකයට අමතරව සධීර සමරවික්‍රම ද ශතකයක් රැස් කිරීමට පෙරමුණු කොට ගෙන එක්දින ලෝක කුසලාන ක්‍රිකට් තරගාවලිය යටතේ හයිද්‍රාබාද් නුවරදි දැන් (10 දා) පැවැත්වෙන එක්දින තරගයේදී නියමිත පන්දුවාර 50 අවසනදී කඩුලු 9 ට ලකුණු 344 ක් රැස් කිරීමට ශ්‍රී ලංකා කණ්ඩායමට හැකියාව ලැබිණ.

පසුපෙළ පිතිකරුවන්ගේ දුර්වලතාවය අද තරගයේදී නොවන්නට ශ්‍රී ලංකා කණ්ඩායමට අද දිනයේදී පහසුවෙන්ම ලකුණු 375 සීමාව පසුකිරීමට අවකාශ තිබිණ. මුහුණ දුන් 65 වැනි පන්දුවේදී ශතකය වාර්තා කරමින් ලෝක කුසලාන තරගාවලියකදී ශ්‍රී ලංකා පිතිකරුවකු විසින් වාර්තා කරන ලද වේගවත්ම ශතක වාර්තාවට හිමිකම් කී කුසල් මෙන්ඩිස්ගෙන් පසු තරගය රැගෙන යෑමේ වගකීම භාර ගත් සධීර සමරවික්‍රම අද දිනයේදී සිය කුළුඳුල් එක්දින ශතකයට හිමිකම් කීවේය. පන්දු 89 කදී ලකුණු 108 ක් ලෙසින් වාර්තා වුණු සධීරගේ ඉනිම සඳහා ඔහු හයේ පහර 2 ක් සහ හතරේ පහර 11 ක් එල්ල කළේය. පන්දු යවන්නන්ට රිසිසේ පන්දුවට පහර එල්ල කළ දකුණත් පිතිකරුවා කුසල් මෙන්ඩිස් සමඟ ලකුණු 111 ක සම්බන්ධතාවක් එක් කිරීමට දායකත්වය දැක්වූවේය.

ආරම්භක පිතිකරුවා වූ කුසල් පෙරේරා පිට පිටම දෙවැනි වතාවටත් ලකුණු නොලබා දැවී යද්දී අංක 3 පිතිකරු ලෙසින් පිටියට පිවිසි කුසල්ට එක් වුණු පැතුම් නිස්සංක පන්දු 61 කදී ලකුණු 51 ක් ලබා ශ්‍රී ලංකා පිලේ අපහසුතාවය මඳකට දුරලීමට දායකත්වය දැක්වූවේය. අද දියේදී මොවුන් තිදෙනා එක්ව රැස් කරන ලද ලකුණු සංඛ්‍යාවත් ප්‍රතිවාදී පිලෙන් ලබා දුන් අතිරේක ලකුණු 14 ත් හැරුණු විට පන්දුවට පහර දීමට පැමිණි සෙසු පිතිකරුවන් 7 දෙනාම රැස් කිරීමට සමත්වූයේ ලකුණු 39 ක් පමණි. ඒ සඳහා ඔවුහු පන්දු 71 ක් වැය කර තිබුණහ.

ශ්‍රී ලංකා පිලට වැඩිම තර්ජනයක් එල්ල කළ පන්දු යවන්නා බවට පත් වුණු හසන් අලීගේ පන්දුවක් හයේ සීමාවට යැවූ කුසල් මෙන්ඩිස් ශතකය සම්පූර්ණ කරන ලද්දේ ලෝක කුසලාන තරගයකදී කුමාර් සංගක්කාරව සතුව තිබූ වේගවත්ම ශතකයේ වාර්තාව තම නම ඉදිරියෙන් ලියා ගනිමිනි. සංගක්කාර ඒ සඳහා පන්දු 70 ක් වැය කර තිබෙද්දී කුසල් මුහුණ දුන් 65 වැනි පන්දුවේදී එම දක්ෂතාව දැක්වූවේය ඒ සමඟම පන්දු 71 ක් තම ඉනිම සඳහා වැය කළ දකුණතු අංක 3 පිතිකරුවා ලබා ගත් ලකුණු 122 සදහා හයේ පහර 6 ක් සහ හතරේ පහර 16 ක් එල්ල කළේ විස්තර විචාරකයින්ගේ නොමද ගරුසරු මධ්‍යෙයේදීය.

අද මෙන්ඩිස් වාර්තා කරන ලද්දේ පාකිස්තානු කණ්ඩායමට එරෙහිව ලෝක කුසලාන තරගාවලියකදී ශ්‍රී ලංකා පිතිකරුවකු වාර්තා කරන ලද පළමු ශතකයයි මීට පෙර පාකිස්තානු පිලට එරෙහිව ශ්‍රී ලංකා පිතිකරුවකු රැස් කර තිබූ ඉහළම ලකුණු සංඛ්‍යාව වූයේ 1987 ලෝක කුසලාන ක්‍රිකට් තරගාවලියේදී රොෂාන් මහානාම විසින් වාර්තා කරන ලද ලකුණු 89 ක ඉනිම විය.

එමෙන්ම එම ශතකය ලෝක කුසලාන ඉතිහාසයේ පිතිකරුවකු රැස් කරන ලද වේගවත්ම ශතක අතර 6 වැන්න ලෙසින්ද සනිටුහන් විය. මීට පෙර ඒඩ්න් මාක්‍රම් (49), කෙවින් ඕබ්‍රියන් (50), ග්ලෙන් මැක්ස්වෙල් (51), ඒ.බී.ඩිවිලියර්ස් (52) සහ එයන් මෝගන් (57) පමණක් මෙන්ඩිස්ට ඉදිරියෙන් සිටින පිතිකරුවෝ වෙති.