ජාත්‍යන්තර ක්‍රිකට් කවුන්සිලය මගින් නිවේදනය කරන ලද නවතම එක්දින පන්දු යවන්නන් ශ්‍රේණිගත කිරීම්වලට අනුව ශ්‍රී ලංකා පිලේ දඟ පන්දු යවන මහීෂ් තීක්ෂණ එහි තෙවැනි ස්ථානය දක්වා ඉදිරියට පැමිණීමට සමත්ව සිටියි. නවසීලන්තයට එරෙහිව පැවැත්වෙන තරගාවලියට පෙර එම 7 වැනි ස්ථානයේ රැදී සිටි තීක්ෂණ එම තරගාවලියේදී දක්වන ලද දක්ෂතා හේතුවෙන් ස්ථාන 4 ක් ඉදිරියට පැමිණෙමින් ලොව තෙවැනි හොඳම  පන්දු යවන්නාගේ ස්ථානයට පැමිිණ සිටියි.

නවසීලන්තයට එරෙහිව නිමාවට පත් වුණු එක්දින තරගාවලියේදී කඩුලු ත්‍රිත්වයක්ද සමඟින් කඩුලු 7 ක් බිඳ හෙළීමට සමත්වීමත් සමඟ තීක්ෂණ ප්‍රසාද ලකුණු 663 ක් ලබා සිටින්නේ එහි පළමු ස්ථානයේ රැදීසිටින ඇෆ්ගනිස්තානු පිලේ රෂීඩ් ඛාන්ට වඩා ලකුණු 6 ක් පිටුපසිනි. රශීඩ් ඛාන් ලකුණු 669 ක් ලබා සිටින අතර දෙවැනි ස්ථානයේ රැඳී සිටින කුල්දීප් යාදව් (665) ක් තීක්ෂණට ඉදිරියෙන් පසුවන්නේ ලකුණු 02 කිනි. මේ අතර පිතිකරුවන් අතර පැතුම් නිස්සංක ප්‍රසාද ලකුණු 666 ක් ලබා 10 වැනි ස්ථානයේ රැදී සිටින්නේය. මෙම තරගාවලියට පෙර 13 වැනි ස්ථානයේ රැදී සිටි නායක චරිත් අසලංක තරගාවලියේදී දක්වන ලද අසාර්ථක භාවය හේතුවෙන් එම ශ්‍රේණිගත කිරීමේ ස්ථාන 5 කින් හෙවත් 18 වැනි ස්ථානය දක්වා පහත බැස තිබේ. කුසල් මෙන්ඩිස් එම ශ්‍රේණිගත කිරීමේ 27 වැනි ස්ථානයේ රැදී සිටින්නේය.