ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන නැෂනල් සුපර් ලීග් ක්‍රිකට් තරගාවලියේ අද (3) ආරම්භ වූ කැන්ඩි හා දඹුල්ල අතර තරග‍යේ පළමු දිනය නිමාවෙද්දී කැන්ඩි පිලේ පැතුම් නිශ්ශංක හා සොහාන් ලිවේරා ශතක රැස්කරමින් දස්කම් දැක්වූහ.‍

කොළඹ ආර්. ප්‍රේමදාස ජාත්‍යන්තර ක්‍රිකට් ක්‍රීඩාංගණයේ පැවැත්වෙන මෙම තරගයේ කාසියේ වාසිය දිනා ගත් දඹුල්ල කණ්ඩායමේ ආරාධනයෙන් මුලින් පන්දුවට පහරදුන් කැන්ඩි ක්‍රීඩකයෝ තරගයේ පළමු දිනය වර්ෂාව හේතුවෙන් අතර මඟ දී නතර කරද්දී කඩුලු 4ක් දැවී ලකුණු 322ක් ලබා සිටියහ.

කැන්ඩි පිලේ ආරම්භක පිතිකරු ලෙස පිටියට පිවිසි පැතුම් නිස්සංක පන්දු 200කට මුහුණ දෙමින් හතරේ පහර 15ක් සමඟ නොදැවී ලකුණු 160ක් ලබා සිටින අතර, වමතින් පන්දුවට පහර දෙන සොහාන් ද ලිවේරා හත‍ේ පහර12ක් සමඟ පන්දු 136කදී නොදැවී ලකුණු 110ක් ලබා සිටී.

පැතුම් තම පළමු පෙළ තරග දිවියේ 17 වැනි ශතකය වාර්තා කළ අතර, 24 හැවිරිදි ලිවේරා පළමු පෙළ තරගවලදී 5 වැනි ශතකය වාර්තා කළේය.

පැතුම් නිස්සංක සහ සොහාන් ද ලිවේරා කැන්ඩි 5 වැනි කඩුල්ලට පන්දු 237කදී නොබිඳුනු ලකුණු 198ක සබඳතාවක් ගොඩගමින් සිටීම කැපී පෙනේ.

තරගයේ 2 වැනි දිනය (4) හෙටයි.

කැන්ඩි පිල පළමු ඉනිම කඩුලු 4ක් දැවී ලකුණු 322 (ඕවර් 71)
පැතුම් නිස්සංක නොදැවී 160, පවන්ත වීරසිංහ 20, සොහාන් ද ලිවේරා නොදැවී 110 (අකිල ධනංජය 102/3)