ලෝක ටෙස්ට් ශූරතාවලිය යටතේ ජූනි 11 වැනිදා එංගලන්තයේ ලෝඩ්ස් ක්‍රීඩාංගණයේදී ආරම්භ වන දකුණු අප්‍රිකාව සහ ඔස්ට්‍රේලියාව අතර අවසන් මහ තරගයේ ජයග්‍රාහකයින්ට ඇමරිකානු ඩොලර් මිලියන 3.6 ක මුදලක් හෙවත් ශ්‍රී ලංකා මුදලින් රුපියල් කෝටි 108 ක් පිරිනැමීමට කටයුතු යොදා තිබෙන බව අන්තර්ජාතික ක්‍රිකට් කවුන්සිලය නිවේදනය කර සිටියි.

2023-25 වසර කාලය ඇතුළත ක්‍රියාත්මක මෙවර ටෙස්ට් ලෝක ශූරතා තරගාවලියේදී අවසන් මහ තරගය ඇතුළුව එම ශ්‍රේණිගත කිරීම්හි එක් එක් ස්ථාන සඳහා පිරිනමනු ලබන ත්‍යාග මුදල් ප්‍රමාණය පිළිබඳව ජාත්‍යන්තර ක්‍රිකට් කවුන්සිලය විසින් අද (15 දා) දිනයේදී නිකුත් කරන ලද නිවේදනයේ ඒ බව සඳහන් විය.

අනුශූරතාව දිනා ගනු ලබන කණ්ඩායමට ඩොලර් මිලියන 2.16 ක් හෙවත් ශ්‍රී ලංකා මුදලින් රු. කෝටි 64 ක මුදලක් පිරිනැමෙන අතර මීට අමතරව එම ප්‍රසාද ලකුණු සටහනේ එක් එක් ස්ථාන අනුව මෙවර ද ත්‍යාග මුදල් බෙදා දෙනු ඇත.

පසුගිය අදියර දෙකට සාපේක්ෂව මෙවර තරගාවලියේදී පිරිනමනු ලබන ත්‍යාග මුදල දෙගුණයකටත් වඩා වැඩි කිරීමට ජාත්‍යන්තර ක්‍රිකට් කවුන්සිලය පියවර ගෙන තිබේ.

මෙවර ටෙස්ට් ලෝක ශූරතාවලියේ තරග වැදි ශ්‍රී ලංකා කණ්ඩායම තරගාවලියේ මූලික වටය අවසනදී 6 වැනි ස්ථානයට පත් වුණු අතර ඒ අනුව ශ්‍රී ලංකාවට ඇමරිකානු ඩොලර් අටලක්ෂ හතළිස් දහසක් (840,000) ක මුදලක් හිමිවන අතර එය ශ්‍රී ලංකා මුදලින් රුපියල් කෝටි 25 කට අධික අගයක් ගනු ඇත. ශ්‍රී ලංකාව මෙවර තරගාවලියේදී ටෙස්ට් තරග 13 කට සහභාගිවී ප්‍රසාද ලකුණු 60 ක් ලබා හයවැනි ස්ථානයට පත්විය.

මෙවර තරගාවලියේ තෙවැනි ස්ථානයට පත් ඉන්දියානු කණ්ඩායමට ඇමරිකානු ඩොලර් මිලියන 1.44 ක් හිමිවන අතර සිව්වැනි ස්ථානයට පත් නවසීලන්තයට ඇ.ඩො.මි. 1.2 ක් ද 5 වැනි ස්ථානයට පත් එංගලන්තයට ඇ.ඩො. 960,000 ක් හිමිවේ.

ඊට අමතරව 7 වැනිසහ 8 වැනි ස්ථානවලට පත් බංග්ලාදේශයට සහ බටහිර ඉන්දීය කොදෙව් කණ්ඩායමට පිළිවෙළින් ඇමරිකානු ඩොලර් හත්ලක්ෂ විසිදහසක් (720,000) සහ හය ලක්ෂයක් (600,000) ද සහ 9 වැනි ස්ථානයට පත් පාකිස්තානයට ඇ.ඩො. හාරලක්ෂ අසූදහසක් (480,000) හිමිවනු ඇත.