බටහිර ඉන්දීය කොදෙව් දේශයේ තරග සංචාරයක නිරතව සිටින ශ්‍රී ලංකා නැගීඑන කණ්ඩායම සහ බටහිර ඉන්දීය කොදෙව් ඇකඩම් පිල සමග පැවැත්වෙන එක්දින තරගාවලිය ආරම්භ කරමින් පැවැති පළමු තරගයෙන් කඩුලු 5 ක විශිෂ්ඨ ජයක් වාර්තා කිරීමට ශ්‍රී ලංකා නැගීඑන කණ්ඩායම සමත්විය.

ශ්‍රීමත් විවියන් රිචර්ඩ්ස් ක්‍රීඩාංගණයේ පැවැති මෙම තරගයේදී පළමුව පන්දුවට පහර දුන් සත්කාරක බටහිර ඉන්දීය කොදෙව් ඇකඩම් කණ්ඩායමට පන්දුවාර 46.2 කදී සියලු දෙනා දැවී රැස් කර ගත හැකි වූයේ ලකුණු 237 ක් පමණි. එම ඉලක්කය හඹා ගිය ශ්‍රී ලංකා නැගීඑන පිතිකරුවෝ පන්දුවාර 39.4 කදී සපුරා ගන්නා ලද්දේ කඩුලු 5 ක් පමණක් ප්‍රතිවාදීන් හමුවේ ලබා දෙමිනි.

ශ්‍රී ලංකා නැගීඑන පිල වෙනුවෙන් සුපිරි පිති හරඹයක් දියත් කළ අහන් වික්‍රමසිිංහ හයේ පහර 2 ක් සහ හතරේ පහර 10 ක් සමගින් පන්දු 79 කදී වේගවත් ලකුණු 103 ක් රැස් කර ගත්තේය. දුවද්දී දැවී යෑමකට හසුව අහන් පිටියෙන් පිවිසෙන විට ශ්‍රී ලංකා නැගීඑන ජයග්‍රහණය සඳහා අවශ්‍යව තිබුණේ ලකුණු 02 ක් පමණි.

ඔහුට අමතරව ආරම්භක පිතිකරු නිපුන් ධනංජය ලකුණු 88 ක් ලබා ගනිමින් පිත්තෙන් කැපී පෙනිණ. පන්දු 125 කට මුහුණ දුන් දකුණත් පිතිකරුවා ඊට හයේ පහර 2 ක් සහ හතරේ  පහර 7 ක් ඇතුළත් කර තිබුණේය.

පන්දු යැවීමේදී ගරුක සංකෙත් සහ ට්‍රෙවීන් මැතිව් කඩුලු 3 බැගින් බිඳ හෙළීමට සමත්වූ අතර ඔවුන් දෙදෙනාට පිළිවෙලින් ප්‍රතිවාදී පිතිකරුවන් ලකුණු 40 සහ 45 බැගින් ලබාගෙන තිබිණ.

බටහිර ඉන්දීය කොදෙව් ඇකඩම් කණ්ඩායම පන්දුවාර 46.2 කදී සියලු දෙනා දැවී ලකුණු 236 යි – (අකීම් ඔගස්ටේ 66, කාල්ටන් බොවෙන් 55, රිවාල්ඩෝ ක්ලාර්ක් 51, නේතන් එඩ්වර්ඩ් 25, ට්‍රෙවීන් මැතිව් 40/3, ගරුක සංකෙත් 45/3, දිලුම් සුදීර 56/1, චමිඳ විජේසිංහ 30/1, ධනංජය ලක්ෂාන් 26/1) 

ශ්‍රී ලංකා නැගීඑන කණ්ඩායම පන්දුවාර 39.4 කදී කඩුලු 5 කට ලකුණු 238 යි – (අහන් වික්‍රමසිංහ 103, නිපුන් ධනංජය 88, ෂෙවෝන් ඩැනියල් 11, සහන් කෝසල 19, නේතන් එඩ්වර්ඩ්ස් 44/2, මැකන් ක්ලාර්ක් 40/1, මිකා මැකෙන්සි 30/1)