ශ්‍රී ලංකා ක්‍රිකට් ආයතනයේ මෙහෙයවීමෙන් ගාල්ලේදී දැන් පැවැත්වෙන වයස අවුරුදු 17 න් පහළ ශ්‍රී ලංකා යූත් ලීග් සීමිත පන්දුවාර පළාත් එක්දින ක්‍රිකට් තරගාවලියේ දෙවැනි දිනය වූ අද (21 දා) පැවැති තරග වලදී ජය වාර්තා කිරීමට ගාල්ල සහ මහනුවර කණ්ඩායම් සමත්වූහ.

සහභාගිවූ පළමු තරගයේදී පරාජයට පත් වුවද කොළඹ උතුරු කණ්ඩායමට එරෙහිව අද පැවැති තරගයේදී සුපුරුදු දක්ෂතා අතරට පිවිසි ගාල්ල කණ්ඩායම කඩුලු 7 ක පහසු ජයක් වාර්තා කළේ හඹා ගිය ලකුණු 208 ක ඉලක්කය කඩුලු 3 ක් පමණක් දැවී ගොස් තිබියදීය. පන්දුවාර 33.4 කදී ගාලු ක්‍රීඩකයෝ ඉලක්කය සපුරා ගන්නා විට සෙහස් අශිංස පන්දු 57 කදී ලකුණු 54 ක් ද සඳරු මල්ෂාන් පන්දු 34 කදී ලකුණු 25 ක්ද ලබා කඩුල්ලේ රැඳී සිටියහ. ඊට අමතරව නායක අරෝෂ් සිතුමින පන්දු 51 කදී ලකුණු 51 ක් ලබා ගත්තේ තම ඉනිමට හයේ පහර 5 ක් සහ හතරේ පහර 3 ක් ඇතුළත් කර ගනිමිනි.

ගාල්ල ජාත්‍යන්තර ක්‍රීඩාංගණයේ පැවැති මෙම තරගයේදී පළමුව පන්දුවට පහර දුන් කොළඹ උතුරු කණ්ඩායම වෙනුවෙන් ආරම්භක පිතිකරු කවිත් ද සිල්වා පන්දු 86 කදී ලකුණු 53 ක් රැස් කර ගත්තේය. ඔහු හැරුණු කොට ලකුණු 25 සීමාව ඉක්මවා ලීමට සමත් වූයේ අංක 9 පිතිකරු මිනුග නෙත්සර (29) පමණි.

කොළඹ උතුරු කණ්ඩායම අඩු ලකුණු සංඛ්‍යාවකට සීමා කිරීම වෙනුවෙන් සුපිරි පන්දු යැවීමක නිරත වුණු රුමේන් පීරිස් ලකුණු 37 කට කඩුලු 4 ක් දවා ගනිමින් වැඩිම කඩුලු ලාභියා බවට පත් වද්දී කවික මදුසංක ලකුණු 28 ක් ඇතුළත පිතිකරුවන් තිදෙනෙකු දවාලූවේය.

කොළඹ උතුරු කණ්ඩායමේ පළමු කඩුලු 8 ලකුණු 139 ක් ඇතුළතදී බිඳ වැටුණද අවසන් කඩුලු දෙකට සවිඳු සත්සර (15) සමග එක් වුණු මිනුග නෙත්සර සහ ජනුල් ධම්හිරු (21) පිළිවෙළින් 9 වැනි සහ 10 වැනි කඩුලු වෙනුවෙන් ලකුණු 34 ක කඩුලු සම්බන්ධතා පැවැත්වීිමට දායකත්වය දැක්වූහ.

මේ අතර කරන්දෙනිය යුද හමුදා ක්‍රීඩාංගණයේ පැවැති අනෙක් තරගයේදී දඹුල්ල කණ්ඩායමට එරෙහිව කඩුලු 5 ක් ජයක් වාර්තා කිරීමට මහනුවර කණ්ඩායම සමත්වූවේය. මෙය මහනුවර කණ්ඩායම මෙම තරගාවලිය යටතේ සහභාගි වූ පළමු තරගය විය.

පළමුව පන්දුවට පහර දුන් දඹුල්ල කණ්ඩායම පන්දුවාර 48.2 කදී ලකුණු 201 කට සීමා කිරීමට සංජන සචින්ද්‍ර (28/4) ප්‍රමුඛ මහනුවර පන්දු යවන්නෝ සමත්වූහ. සංජනට අමතරව චනුල් කොඩිතුවක්කු සහ ඉමෙත් රාජපක්ෂ කඩුලු 2 බැගින් බිඳ හෙලූහ. මොවුන් පන්දුවෙන් දක්ෂතා දක්වද්දී දඹුල්ල කණ්ඩායමේ පළමු කඩුලු 7 ම ලකුණු 121 කදී බිඳ වැටී තිබියදී පිටියට එක් වුණු ඉෂාන් ඛාන් (62), ෂෙනන් ප්‍රනාන්දු (26) සහ අංක 9 පිතිකරු චමෝද් ප්‍රභාෂන (46*) එක්ව ලකුණු රැස් කිරීම නිසා ලකුණු 200 සීමාව ඉක්මවාලීමට දඹුල්ල කණ්ඩායමට අවකාශ උදාවිය.

කෙසේ වෙතත් එම ඉලක්කය හඹා ගිය මහනුවර කණ්ඩායමේද පළමු කඩුලු 5 ලකුණු 69 කදී බිද දැමීමට දඹුලු පන්දු යවන්නන් සමත් වුවද 6 වැනි කඩුල්ල වෙනුවෙන් එක් වුණු සනිතු ගුණතිලක සහ ප්‍රවීන් ගමගේ දෙදෙනා එක්ව පන්දු 159 කදී නොබිඳුණු ලකුණු 133 ක සම්බන්ධතාවක් පවත්වමින් තම කණ්ඩායම ජයග්‍රහණය කරා රැගෙන ගියහ.

මෙහිදී සනිතු ගුණතිලක පන්දු 118 කදී නොදැවී ලකුණු 93 ක් රැස් කරන ලද්දේ හයේ පහරක් සහ හතරේ පහර 8 ක් තම ඉනිමට ඇතුළත් කර ගනිමිනි.  සනිතු රැස් කරන ලද මෙම ලකුණු සංඛ්‍යාව මෙවර තරගාවලියේදී පිතිකරුවක් රැස් කරන ලද ඉහළම ලකුණු සංඛ්‍යාව ලෙසින් සනිටුහන් විය. ඔහුට අනගි සහායක් ලබා දුන් ප්‍රවීන් ගමගේ පන්දු 66 කදී ලකුණු 43 ක් ලබා කඩුල්ලේ රැඳී සිටියේය.

මෙම සම්බන්ධතාව ප්‍රධාන කොට ලකුණු 202 ක ඉලක්කය මහනුවර කණ්ඩායම රැස් කර ගන්නා ලද්දේ පන්දුවාර 45.2 ක් අවසනදී කඩුලු 5 ක් පමණක් දැවී ගොස් තිබියදීය.

 ගාල්ල කණ්ඩායමට කඩුලු 7 ක ජයක්

කොළඹ උතුර පන්දුවාර 48.4 කදී සියලු දෙනා දැවී ලකුණු 207 යි – (කවිත ද සිල්වා 53, කෞෂික තිලකරත්න 21, නවනිඳු හෙට්ටිආරච්චි 22, ලිතුම් සෙනුජ 10, දුමීන් ලියනාරච්චි 10, මිනුග නෙත්සර 29, සවිඳු සත්සර 15, ජනුල් ධම්හිරු 12*, රුමේන් පීරිස් 37/4, කවික මදුසංක 28/3)

ගාල්ල කණ්ඩායම පන්දුවාර 33.4 කදී කඩුලු 3 ට ලකුණු 208 යි – (සෙහස් අහිංස 54*, පුල්ජිත් වත්සුක 51, අරෝෂ් සෙතුමිණ 51, සඳරු මල්ෂාන් 25, මිනුග නෙත්සර 60/2)

මහනුවර කණ්ඩායමට කඩුලු 5 ක ජයක්

දඹුල්ල කණ්ඩායම පන්දුවාර 48.2 කදී සියලු දෙනා දැවී ලකුණු 201 යි – (අමල් පෙරේරා 24, ඉෂාන් ඛාන් 62, ෂෙනන් ප්‍රනාන්දු 26, චමෝද් ප්‍රභාෂ 46, සංජන සචින්ද්‍ර 28/4, චනුල් කොඩිතුවක්කු 38/2, ඉමෙත් රාජපක්ෂ 36/2)

මහනුවර පන්දුවාර 45.2 කදී කඩුලු 5 ක් දැවී ලකුණු 202 යි – (සනිතු ගුණතිලක 93*, ප්‍රවීන් ගමගේ 43*, දිනුල් විජේසිංහ 20, යෙනුල හේවාවිතාරණ 11, දිහාන් මුණසිංහ 29/2)