තෙදින තරග දෙකකට සහ එක්දින තරග 3 කට සහභාගිවීම සඳහා බංග්ලාදේශය බලා පිටත්ව යෑමට නියමිත ශ්‍රී ලංකා වයස අවුරුදු 17 න් පහළ කණ්ඩායම මෙහෙයවීමේ වගකීම කොළඹ රාජකීය විදුහලේ රෙහාන් පීරිස්ට පැවැරී තිබේ. ක්‍රීඩකයින්  15 දෙනෙකුගෙන් යුත් ශ්‍රී ලංකා අවුරුදු 17 න් පහළ පිල එම තරග සංචාරයට සහභාගිවීම සඳහා නොවැම්බර් 24 වැනි සඳුදා අළුයම බංග්ලාදේශය බලා පිටත්ව යනු ඇත.

නම් කර ඇති කණ්ඩායමට වැඩිම ක්‍රීඩකයින් සංඛ්‍යාවක් එක්ව සිටින්නේ කොළඹ රාජකීය විදුහල නියෝජනය කරමිනි. රෙහාන් පීරිස් හැරුණු කොට හිරුන් මතීෂ සහ හිමරු දේශාන් එම ක්‍රීඩකයෝ වෙති.

මීට අමතරව පිට පළාත් නියෝජනය කරමින් වැඩිම නියෝජනයක් ඇත්තේ ගාල්ල සහ මහනුවර දිස්ත්‍රික්කවලින් වේ. මෙහිදී අරෝෂ් සිතුමිණ සහ පුල්ජිත් වත්සුක රත්ගම දේවපතිරාජ විදුහලද චනුල් කොඩිතුවක්කු සහ කෙනුල පිහිලියනාග කිංග්ස්වුඩ් විදුහල නියෝජනය කරමින්ද කණ්ඩායමට පිවිස සිටිති. නම් කරන ලද කණ්ඩායමට ඇතුළත්ව සිටින නායක රෙහාන් ප්‍රනාන්දු සහ ජේසන් ප්‍රනාන්දු හැරුණු කොට සෙසු ක්‍රීඩකයින් 13 දෙනාම අවුරුදු 17 න් පහළ කණ්ඩායම නියෝජනය කරනු ලබන නවකයෝ වෙති.

තරග 2 කින් සමන්විත තෙදින තරගාවලියෙන් තරගාවලිය ආරම්භ වන අතර නොවැම්ර් මස 27 වැනිදා සිට 29 වැනිදා දක්වා මීර්පූර්හිදීත් දෙවැන්න දෙසැම්බර් 02 වැනිදා සිට 04 වැනිදා දක්වා බෂුන්දර්හීදීත් පැවැත්වෙනු ඇත.

තරග 3 කිින් සමන්විත එක්දන තරගාවලියේ සියලුම තරග චැටෝග්‍රෑම්හිදී පැවැත්වෙනු ඇත. එම තරග 3, දෙසැම්බර් 07, 09 සහ 12 යන තෙදිනදී පැවැත්වෙනු ඇත.

තරගාවලියේ කාල සටහන

නොවැම්බර් 27-29 –  පළමු තෙදින තරගය මීර්පූර්හිදී

දෙසැම්බර් 02-04 – දෙවැනි තෙදින තරගය බෂුන්දර්හිදී

දෙසැම්බර් 07 – පළමු එක්දින රගය චැටෝග්‍රෑම්හිදී

දෙසැම්බර් 09 – දෙවැනි එක්දින තරගය චැටෝග්‍රෑම්හිදී

දෙසැම්බර් 12- තෙවැනි එක්දින තරගය චැටෝග්‍රෑම්හිදී