ශ්‍රී ලංකාව සහ බංග්ලාදේශ අවුරුදු 17 න් පහළ කණ්ඩායම් අතර මීර්පූර්හි පැවැති පළමු තුන්දින පුහුණු තරගයෙන් ලකුණු 27 ක ජයක් වාර්තා කර ගැනීමට බංග්ලාදේශ අවුරුදු 17 න් පහළ කණ්ඩායම අද (29 දා) පස්වරුවේදී සමත්විය. ඒ අනුව තරග 2 කින් සමන්විත නිල නොවන තුන්දින ටෙස්ට් තරගාවලිය 1-0 ක් ලෙස පෙරමුණ ගැනීමට ද බංග්ලාදේශ අවුරුදු 17 න් පහළ ක්‍රීඩකයෝ සමත්වූහ.

ලකුණු 230 කට කඩුලු 8 ක් දැවී තිබියද තෙවැනි දිනය ආරම්භ කළ බංග්ලාදේශ යොවුන් කණ්ඩායම අද දිනයේදී තවත් ලකුණු 17 ක් ලබා ගන්නා අතර වාරයේදී ඉතිරි කඩුලු 2 දවා ගැනීමට ශ්‍රී ලංකා පන්දු යවන්නන් සමත්විය. ඒ අනුව ශ්‍රී ලංකාවට ලකුණු 266 ක ඉලක්කයක් හිමිවූ නමුත් බංග්ලාදේශ පන්දු යැවීමේ බලපරාක්‍රමය හමුවේ පන්දුවාර 7.14 කදී රැස් කරගත හැකි වූයේ සියලු දෙනා දැවී ලකුණු 238 ක් පමණි.

ශ්‍රී ලංකා පිල වෙනුවෙන් වැඩිම ලකුණු ලාභියා බවට පත්වූයේ සනුල් වීරරත්න වන අතර ඔහු පන්දු 134 කට මුහුණ දී ලකුණු 61 ක් ලබා ගත්තේය. ඊට අමතරව ආරම්භක පිතිකරු අරෝෂ සිතුමිණ පන්දු 42 කදී වේගවත් ලකුණු 40 ක් රැස් කර ගත්තේය.

ඊට අමතරව ජේසන් ප්‍රනාන්දු පන්දු 37 කදී ලකුණු 22 ක්ද ඉනිම අවසන් වන විට ගිම්හාන් මෙන්ඩිස් පන්දු 48 කදී නොදැවී ලකුණු 22 ක් ද ලබා ගත්හ. කඩුලු දවා ගැනීමේදී රකිබුල් හොසේන් ලකුණු 32 කට කඩුලු 4 ක් දවා ඉනිමේ හොඳම පන්දු යැවීම වාර්තා කරගද්දී මහබීර්, ශයිදුල් සහ අලාම් කඩුලු 2 බැගින් දවා ගත්හ.  

මෙම තරගයේ පළමු දිනය තුළදී දෙපිළේම කඩුලු 22 ක් දැවී ගියද දෙවැනි ඉනිමේදී ඒ වැරැද්දම යළිත් සිදු නොවීමට ඉඩ නොදුන් බංග්ලාදේශ යොවුන් පිතිකරුවෝ දෙවැනි ඉනිම වෙනුවෙන් ලකුණු 238 ක් රැස් කරගත්තේය. පළමු දිනය ඇතුළතදීි දෙපිළේම කඩුලු 20 සහ බංග්ලාදේශ ඉනිමේ කඩුලු 2 ක් ද දැවී ගිය නමුත් දෙවැනි දිනයේ සිට එහි පාලනය තමන් සත්කරයේ රඳවා ගැනීමට සත්කාරක පිතිකරුවෝ සමත්වූහ.

දෙවැනි දිනයේදී කඩුලු 6 ක් දවා ගෙන සිටි වමත් දඟ පන්දු යවන ක්‍රීඩක හිමරු දේශාන්ට අද දිනයේදී එකම කඩුල්ලක් හෝ දවා ගැනීමට නොහැකි විය. දැවී ගිය අනෙත් කඩුලු 4 න් 2 ක් ගිම්හාන් මෙන්ඩිස් දවා ගනිද්දීි නදුන් බණ්ඩාර සහ මනිත රාජපක්ෂ එක් කඩුල්ල බැගින් බිඳ හෙළූහ.

බංග්ලාදේශ අවුරුදු 17න් පහළ කණ්ඩායම පළමු ඉනිම පන්දුවාර 39.3 කදී සියලුම දෙනා දැවී ලකුණු 120 යි – (ලෝරන්ස් රෝයි 19, අඩ්රිටෝ ගෝෂ් 36, ජුනයිඩ් හොසේන් 19, Md. රකිබුල් හොසේන් 20, ගිම්හාන් මෙන්ඩිස් 14/2, හිමරු දේශාන් 20/2, මානිත රාජපක්ෂ 29/4)

ශ්‍රී ලංකා අවුරුදු 17න් පහළ කණ්ඩායම පළමු ඉනිම පන්දුවාර 27.4 කදී සියලුම දෙනා දැවී ලකුණු 102 යි (සනුල් වීරරත්න 27, හිමරු දේශාන් 24, මෙහොමඩ් අකාෂ් 33/2, මහීනුජ්මාන් ජබීර් 22/3, නුබයෙට් අලාම් 30/2, ශිදුල් ඉස්ලාම් 15/2)

බංග්ලාදේශ වයස අවුරුදු 17න් පහළ කණ්ඩායම දෙවැනි ඉනිම පන්දුවාර 103 කදී සියලු දෙනා දැවී ලකුණු 238 යි   කවුසාර් අහමඩ් 18, රකිබුල් හොසේන් 41, ජුනයිඩ් හොසේන් 87, සෞරවු කාමකාර් 25, හිමරු දේශාන් 83/6, ගිම්හාන් මෙන්ඩිස් 53/2)

ශ්‍රී ලංකා අවරුදු 17 න් පහළ කණ්ඩායම දෙවැනි ඉනිම පන්දුවාර 71.4 කදී සියලු දෙනා දැවී ලකුණු 238 යි – (අරෝෂ සිතුමිණ 40, ජේසන් ප්‍රනාන්දු 22, සනුල් වීරරත්න 61, ගිම්හාන් මෙන්ඩිස් 22*, මහීනුජ්ජුමාන් මහාබිරී 36/2, නුබයෙත් අලාම් 75/2, ශහිදුල් ඉස්ලාම් 43/2, රකිබුල් හොසේන් 32/4)