පෙබරවාරි 7 සිට මාර්තු 8 දක්වා ශ්‍රී ලංකාව සහ ඉන්දියාව සම සත්කාරකත්වයෙන් පැවැත්වීමට නියමිත ICC පිරිමි විස්සයි-20 ලෝක කුසලාන ක්‍රිකට් තරගාවලිය වෙනුවෙන් පැවැත්වෙන කුසලාන සංචාරයේ දෙවැනි අදියර ආරම්භ කරමින් එම කුසලානය අද (30) පල්ලෙකැලේ ජාත්‍යන්තර ක්‍රීඩාංගණයේ පැවැති ශ්‍රී ලංකා – එංගලන්ත පළමු විස්සයි-20 තරගයට පෙර ක්‍රීඩා ලෝලීන්ට දැක බලා ගැනීම සඳහා රැගෙන එනු ලැබීය.

ලෝක කුසලාන උණුසුම දිවයින පුරා පැතිරවීම අරමුණු කරගත් මෙම ‘කුසලාන සංචාරය’ පල්ලෙකැලේට රැගෙන ඒමට පෙර මහනුවර වැව, ක්වීන්ස් හෝටලය අසළ සහ ශ්‍රී දළදා මාලිගාව අවට ප්‍රදේශවල තබා ක්‍රීඩා ලෝලීන්ට කුසලානය සමඟ ඡායාරූප ලබා ගැනීමට අවස්ථාව සලසා තිබුණි. පෙ.ව. 9.30ට ආරම්භ වූ නගර සංචාරයෙන් අනතුරුව පෙ.ව. 11.30 සිට ප.ව. 4.00 දක්වා කැන්ඩි සිටි සෙන්ටර්හිදී කුසලානය මහජන දර්ශනය සඳහා තබා තිබුණි.

පසුව පල්ලෙකැලේ ජාත්‍යන්තර ක්‍රීඩාංගණයට රැගෙන ආ කුසලානය සංස්කෘතික නර්තන සංදර්ශනයක් සමඟ ප්‍රේක්ෂකයන්ට දැක බලා ගැනීම සඳහා ක්‍රීඩාංගණයේ තැබිය.

මෙම කුසලාන සංචාරය යටතේ හෙට (ජනවාරි 31) උදෑසන 7.00ට මහනුවරින් දඹුල්ල බලා පිටත්ව යෑමට නියමිත අතර, පෙ.ව. 8.00ට දඹුල්ල ප්‍රධාන බස් නැවතුම්පොළට ළඟාවනු ඇත. අනතුරුව පෙ.ව. 10.00ට රංගිරි දඹුලු ජාත්‍යන්තර ක්‍රීඩාංගණයට රැගෙන යාමට නියමිත කුසලානය, එම ප්‍රදේශයේ ක්‍රීඩා ලෝලීන්ට දැක බලා ගැනීමට අවස්ථාව සලසනු ඇත. පස්වරුවේදී දඹුල්ල නගරය තුළ සංචාරය කරන අතර, දඹුල්ල රජ මහා විහාරය, දඹුල්ල ගුහා විහාරය සහ සීගිරිය වැනි ඓතිහාසික ස්ථාන වෙතද කුසලානය රැගෙන යාමට නියමිතය. එම සියලු ස්ථානවලද මහජනතාවට කුසලානය සමඟ විශේෂ ඡායාරූප ලබා ගැනීමේ අවස්ථාව හිමිවනු ඇත.