ශ්‍රී ලංකා වේගපන්දු යවන ක්‍රීඩක ලහිරු කුමාරගේ විශිෂ්ට පන්දු යැවීම හේතුවෙන් බටහිර ඉන්දීය කොදෙව් සංචිත XI කණ්ඩායම සමඟ කූලිජ් ක්‍රිකට් ක්‍රීඩාංගණයේදී පැවැත්වෙන සිව්දින පුහුණු තරගයේ පළමු දිනයේ (18 දා) වාසිය අත්කර ගැනීමට ශ්‍රී ලංකාව සමත් විය.

කාසියේ වාසිය දිනාගත් ශ්‍රී ලංකා නායක ධනංජය ද සිල්වා පළමුව පන්දු යැවීමට තීරණය කළ අතර එම තීරණය සාර්ථක කරමින් පෙරමුණ ගත් ළහිරු කුමාර සිය සුපුරුදු වේගය සහ ආක්‍රමණශීලී පන්දු යැවීම ප්‍රදර්ශනය කරමින්  ලකුණු 39කට කඩුලු 4ක් දවා ගත්තේය.

තරගය පුරාම පිතිකරුවන්ට නිදහසේ ලකුණු රැස් කිරීමට ඉඩ නොදුන් ලහිරු, නිරන්තරයෙන්ම පීඩනයක් ගොඩනඟමින් කඩුලු බිඳ හෙළීමට සමත් විය. පසුගිය කාලය පුරා ආබාධ හේතුවෙන් කණ්ඩායමෙන් ඈත්ව සිටි ඔහු නැවතත් තම දක්ෂතා විදහා දැක්වීම ශ්‍රී ලංකා කණ්ඩායමට ඉදිරි තරගාවලි සඳහා සුබ ලකුණක් ලෙස සැලකේ.

සත්කාරක පිල වෙනුවෙන් ආරම්භක පිතිකරු කර්ක් මැකෙන්සි ලකුණු 58ක් රැස් කරමින් සටන්කාමී ඉනිමක් ක්‍රීඩා කළද, අනෙකුත් පිතිකරුවන්ට ශ්‍රී ලංකා පන්දු යවන්නන්ගේ පීඩනය හමුවේ සාර්ථක වීමට නොහැකි විය. ලහිරුට අමතරව අසිථ ප්‍රනාන්දු ලකුණු 26කට කඩුලු 2ක් දවා ගනිමින් හොඳ සහායක් ලබා දුන්නේය.

පන්දු යවන්නන්ගේ දක්ෂතා මත ශක්තිමත් ස්ථානයක් ගොඩනඟාගත් ශ්‍රී ලංකාව සිය පළමු ඉනිම ආරම්භ කරමින් දිනය අවසන් වන විට එක් කඩුල්ලක් පමණක් දැවී ලකුණු 38ක් රැස් කරගෙන සිටියේය. ආරම්භක පිතිකරු නිශාන් මදුෂ්ක නොදැවී ලකුණු 25ක් ලබා සිටි යි. ශ්‍රී ලංකාව තවමත් ලකුණු 167ක් පසුපසින් සිටියද අතේ කඩුලු 9ක් ඉතිරිව තිබේ.

බටහිර ඉන්දීය කොදෙව් සංචිත XI කණ්ඩායම පන්දුවාර 61.4 කදී සියලු දෙනා දැවී ලකුණු 205 යි – (ක්රේ මැකෙන්සි 58, ලහිරු කුමාර 39/4, අසිත ප්‍රනාන්දු 26/2)

ශ්‍රී ලංකා කණ්ඩායම පන්දුවාර 8 කදී කඩුල්ලක් දැවී ලකුණු 38 යි – (නිශාන් මදුෂ්ක 25*)