ශ්‍රී ලංකා නැගී එන ක්‍රිකට් කණ්ඩායම සහ සංචාරක බටහිර ඉන්දීය කොදෙව් ඇකඩමි ක්‍රිකට් කණ්ඩායම අතර පැවැත්වෙන තරග 3කින් සමන්විත එක්දින සීමිත පන්දුවාර තරගාවලියේ පළමු තරගය වර්ෂාව හේතුවෙන් පන්දුවක් හෝ නොයවා අතහැර දැමීමට සිදු විය.

මෙම තරගය ජුනි 22 වැනිදා කොළඹ SSC ක්‍රීඩාංගණයේදී පැවැත්වීමට නියමිතව තිබුණද, දිගින් දිගටම පැවැති අයහපත් කාලගුණ තත්ත්වය හේතුවෙන් කාසියේ වාසිය උරගා බැලීමක් හෝ නොකරම තරගය නතර කිරීමට තරග තීරක මනෝජ් මෙන්ඩිස් සහ පිටියේ විනිසුරුවන් වූ රැන්මෝ මාටිනස් හා චන්ද්‍රික අමරසිංහ කටයුතු කළහ.

මෙම සංචාරයේදී දෙරට කණ්ඩායම් මීට පෙර සිව්දින නිල නොලත් ටෙස්ට් තරග දෙකකටද සහභාගී වූ අතර, එම තරගාවලිය 1-0ක් ලෙස ජය ගැනීමට ශ්‍රී ලංකා නැගී එන කණ්ඩායම සමත් විය.

එම සිව්දින තරගාවලියේ ශ්‍රී ලංකා කණ්ඩායම මෙහෙයවූයේ දිනුර කළුපහන වන අතර, එක්දින තරගාවලියේ නායකත්වය නිපුන් ධනංජය වෙත පවරා ඇත. සංචාරක බටහිර ඉන්දීය කොදෙව් ඇකඩමි කණ්ඩායම සුපුරුදු පරිදි රිවාල්ඩෝ ක්ලාක් විසින් නායකත්වය දරයි.

දෙරට අතර පැවැත්වෙන දෙවැනි එක්දින සීමිත පන්දුවාර තරගය මේ මස 24 වැනිදා ද එම SSC ක්‍රීඩාංගණයේදීම පැවැත්වීමට නියමිතය.