බටහිර ඉන්දීය කොදෙව් කණ්ඩායම සමඟ අද (03) ආරම්භ වන දෙවැනි සහ අවසන් ටෙස්ට් ක්රිකට් තරගය සඳහා ශ්රී ලංකා සංචිතය තෝරා ගැනීමේදී ක්රීඩකයන් සිව්දෙනකුට වෛද්ය හේතු මත අවස්ථාව අහිමි වී තිබේ.
ඒ අනුව වේගපන්දු යවන ලහිරු කුමාර, විශ්ව ප්රනාන්දු, දඟ පන්දු යවන රමේෂ් මෙන්ඩිස් සහ ආරම්භක පිතිකරු පැතුම් නිශ්ශංක දෙවැනි ටෙස්ට් තරගයට ක්රීඩා නොකරනු ඇත.
පළමු ටෙස්ට් තරගයේදී දකුණු පාදයේ මාංශ පේශීවල ආබාධයක් හේතුවෙන් ලහිරු කුමාර මේ වන විට ප්රතිකාර සඳහා යොමු කර ඇති අතර පුහුණුවීම්වලදී විශ්ව ප්රනාන්දුගේ දකුණු පස පහළ කොන්ද සහ උකුල ප්රෙද්ශයේ ආබාධයකට ගොදුරුව තිබේ. ඔහුගේ තත්ත්වය ක්රමයෙන් යහපත් අතට හැරී තිබුණද තවමත් සම්පූර්ණ සුවය ලබා නොමැති බැවින් දෙවැනි ටෙස්ට් තරගයට ඔහු තෝරාගෙන නොමැත.
රමේෂ් මෙන්ඩිස් ද සංචාරය අතරතුර වැළඳුණු බැක්ටීරියා ආසාදනයකින් සුවය ලබමින් සිටින අතර එම හේතුවෙන් ඔහුද තරගයට එක් නොවනු ඇත.
ශ්රී ලංකා කණ්ඩායමට එල්ල වූ විශාලතම පසුබෑම වන්නේ ආරම්භක පිතිකරු පැතුම් නිශ්ශංකගේ ආබාධයයි. පළමු ටෙස්ට් තරගයෙන් අනතුරුව ඔහුගේ මැණික් කටුවේ දිගින් දිගටම වේදනාව පැවති අතර වෛද්ය නිර්දේශය අනුව ශල්යකර්මයකට භාජනය වීමට තීරණය කර තිබේ. ඒ අනුව නිශ්ශංක පසුගිය ජූනි 30 වැනිදා එක්සත් රාජධානිය බලා පිටත්ව ගොස් ඇති අතර එහිදී ඔහුට සැත්කම සිදුකිරීමට නියමිතය.
