ආසියානු ක්‍රිකට් කවුන්සිලයේ මෙහෙයවීමෙන් පැවැත්වෙන නැගී එන කාන්තා කණ්ඩායම් අතර වූ ආසියානු කුසලාන ක්‍රිකට් තරගාවලියේ සමාරම්භක දිනය වූ අද (22 දා) දිනයේ පැවැත්වීමට නියමිතව තිබූ සත්කාරක ශ්‍රී ලංකාව සහ පාකිස්තානය අතර තරගය වර්ෂාව හේතුවෙන් අත හැර දැමීමට විනිසුරුවෝ තීරණය කළහ.

කොළඹ ආර්. ප්‍රේමදාස ක්‍රීඩාංගණයේ පැවැත්වීමට නියමිත මෙම තරගයට උදෑසන කාලයේ සිටම විටින් විට වර්ෂාවෙන් බාධා ඇතිවීම නිසා තණතීරුව ඇතුළු මුළු ක්‍රීඩාංගණයම වැසි ආවරණවලින් වසා තැබීමට ක්‍රීඩාංගණ කාර්ය මණ්ඩලය සිදුවිය.

කොයි මොහොතක හෝ අහස් කුස හරහා අව් රශ්මික් පතිත වනු ඇතැයි අපේක්ෂාවෙන් පසුවුවත් ප.ව. 12.15 පමණ යළිත් සිහින් වර්ෂාවක් ක්‍රීඩාංගණය වෙත ඇද වැටීම නිසා ප.ව. 12.50 ට තරගය අතහැර දැමීමට තරගයේ විනිසුරුවරුන් තීරණහ කළහ. එක්දින තරගයකදී එක් කණ්ඩායමක් අවම වශයෙන් පන්දුවාර 20 කට ක්‍රීඩා කළ යුතු වන බැවින් මෙම තරගය අද දිනට පවත්වන්නේ නම් අවම වශයෙන් ප.ව. 2.23 ට හෝ ඊට පෙර ආරම්භ කළ යුතු විය.

ක්‍රීඩාංගණය තුළ පවතින තෙත බරිත තත්ත්වය මත ප.ව. 2.23 ට තරගය ආරම්භ කිරීමේ හැකියාවක් නොමැති බව වැටහී යෑම නිසා විනිසුරුවන් දෙන ලද උපදෙස් අනුගමනය කරමින් දෙපිළේම නායිකාවන්ගේ කැමැත්ත මත තරගය නියමිත කාලයට පෙර තරගය අතහැර දැමීමට විනිසුරුවෝ කටයුතු කළහ. මෙම තරගයේ ප්‍රධාන විනිසුරුවරුන් ලෙස ඉන්දීය විනිසුරුවරියක් වන එන්. ජනනි සහ බංග්ලාදේශ විනිසුරුවරයකු වන මර්ෂාඩ් අලී ඛාන් ද තෙවැනි විනිසුරු ලෙස අසංග ජයසූරිය සහ තරග තීරක ලෙස ප්‍රදීප් ජයප්‍රකාශ්දරන් යන මහත්ම මහත්මීන්හු කටයුතු කළහ.

මෙම තරගාවලිය යටතේ අද දිනයේදී කොළඹ තර්ස්ටන් ක්‍රීඩා පිටියේදී ඉන්දියාව සහ බංග්ලාදේශය අතර තරගයද  පැවැත්වීමට නියමිතව තිබුණද එම තරගයටද වර්ෂාව හරස්වීම නිසා ප.ව. 11 වන විටම තරගය අතහැර දැමීමට විනිසුරුවෝ පියවර ගෙන තිබුණි.