කොවිඩ් 19 හෙවත් කොරෝනා වසංගතය හේතුවෙන් නිවෙස් වලට වී කාලය ගත කිරීමට සිදුවී තිබෙන ක්‍රිකට් ක්‍රීඩකයින්ගේ මානසික මට්ටම මෙන්ම ශාරීරික යෝග්‍යතාවය පවත්වාගෙන යෑම සඳහා එදිනෙදාට කිරීම සඳහා වූ විශේෂ මාර්ගෝපදේශන වැඩසටහන් මාලාවක් හඳුන්වා දීමට බස්නාහිර පළාත් ක්‍රිකට් සංගමය පියවර ගෙන තිබේ.
දීර්ඝ කාලයක් ක්‍රීඩා කාර්යයක නොයෙදුණහොත් නැවත සිය ක්‍රියාකාරකම් ආරම්භ කිරීමේදී ක්‍රීඩකයින් දැඩි අපහසුතාවයකට මෙන්ම ආබාධවලට ලක්වීමේ ප්‍රවණතාවක් ඇතිවන හෙයින් මේ පිළිබඳව අවධානය යොමු කරමින් එකී මාර්ගෝපදේශන වැඩසටහන් මාලාව නිවසේ සිටම සිදු කිරීමට බස්නාහිර පළාත් ක්‍රිකට් සංගම් බලධාරීහු ක්‍රීඩකයින්ට උපදෙස් ලබා දී තිබේ.
මේ සම්බන්ධව මේ වන විටත් සියළුම දිස්ත්‍රික් සහ පළාත් පුහුණුකරුවන්ව දැනුම්වත් කිරීමට පියවර ගෙන තිබෙන බස්නාහිර පළාත් ක්‍රිකට් සංගමය, ක්‍රීඩකයින් එදිනෙදා සිදුකරනු ලබන සියළුම පුහුණුවීම් සහ ව්‍යායාම් කටයුතු වීඩියෝ ගත කොට එම පුහුණුකරුවන් මාර්ගයෙන් බස්නාහිර පළාත් ක්‍රිකට් සංගමය වෙත එවන ලෙසද වැඩිදුරටත් දැනුම් දී තිබේ.
මෙම කාල සීමාව ඇතුළතදී බොහෝ ක්‍රීඩකයින්ට ශරීර සුවතා උපකරණ හෝ ශාරීරික යෝග්‍යතා ආයතනයකට යෑමේ අවස්ථාව නොමැති නමුත් සිය නිවසේ සිටම සිදුකළ හැකි අන්දමේ පුහුණු කටයුතු සහ ව්‍යායාම ක්‍රීඩකයින්ට ලබා දී තිබෙන මාර්ගෝපදේශන වැඩසටහනට ඇතුළත් කර තිබේ.
එමෙන්ම මෙම වැඩසටහනට අමතරව ක්‍රීඩකයින්ගේ පෝෂණ තත්ත්වය පිළිබඳව මෙන්ම මානසික තත්ත්වය යහපත් තත්ත්වයක පවත්වාගෙන යෑමද පිළිබඳව අවධානය යොමු කර තිබේ.
