ශ්‍රී ලංකා ක්‍රිකට් ආයතනයේ මෙහෙයවීමෙන් පවත්පැවනු ලබන අන්තර් සමාජ පළමු පෙළ සීමිත පන්දුවාර ක්‍රිකට් තරගාවලිය ඔක්තෝබර් 27 වැනිදා ආරම්භ වේ. කණ්ඩායම් 26 කගේ සහභාගිත්වයෙන් පැවැත්වෙන මෙම තරගාවලිය ‘ඒ’ සහ ‘බී’ යනුවෙන් ප්‍රධාන කාණ්ඩ දෙකක් යටතේ පැවැත්වේ.

නොවැම්බර් 28 වැනිදා පැවැත්වෙන අවසන් මහ තරගයට පෙර මූලික වටය යටතේ සෑම කණ්ඩායමක්ම තරග 12 කට තරග වැදීමට නියමිතවය. කොරෝනා වෛරසයේ නව ප්‍රභේදය රට පුරා ව්‍යප්තව ගිය බැවින් තරගාවලියේ සියළුම තරග සෞඛ්‍ය අමාත්‍යාංශය ලබා දී තිබෙන නීරෝධායන නීති රීතීන්ට යටත්ව පැවැත්වේ.

අරවින්ද ද සිල්වා මහතාගේ ප්‍රධානත්වයෙන් යුතු ක්‍රිකට් තාක්ෂණික කමිටුවේ නිර්දේශයන් මත මෙතෙක් පැවැති ‘ඒ’ සහ ‘බී’ තරගාවලි, මෙම වසරේ සිට එකම තරගාවලියක් ලෙසින් පැවැත්වීම විශේෂත්වයක් ලෙස හැඳින්විය හැක. අවසන් වසරේ පැවැති සීමිත පන්දුවාර ක්‍රිකට් තරගාවලියේ අවසන් මහ තරගයේදී රාගම ක්‍රීඩා සමාජයට එරෙහිව ලකුණු 145 ක ජයක් වාර්තා කළ එන්.සී.සී. කණ්ඩායම වත්මන් එක්දින ශූරයින් බවට පත්ව සිටියි.

‘ඒ’ කාණ්ඩය – එන්.සී.සී., යුද හමුදාව, මුවර්ස්, නාවික හමුදා, කුරුණෑගල, සී.සී.සී., නිගම්බු, නුගේගොඩ, බී.ආර්.සී. කැන්ඩි කස්ටම්ස්, කලුතර නාගරික, ලන්කන්, ගුවන් හමුදාව.

‘බී’ කාණ්ඩය – රාගම, බදුරලිය, ටැමිල් යුනියන්, එස්.එස්.සී., බ්ලූම්ෆීල්ඩ්, කෝල්ට්ස්, සරසන්ස්, හලාවත මේරියන්ස්, ගාල්ල, පානදුර, පොලිස්, සෙබස්තියනයිට්ස්, ඒස් කැපිටල්.