slc
Home   |    News
නොවැම්බර් 21, 2021
ශ්‍රී ලංකාව දැවැන්ත ලකුණු සංඛ්‍යාවකට මුල පුරයි

sinhala editor

By Chamila Karawita reporting form Galle

දඟ පන්දු යවන්නන්ගේ පාරාදීසයක් බඳු ගාල්ල ජාත්‍යන්තර ක්‍රීඩාංගණයේදී අද (21 දා) බටහිර ඉන්දීය කොදෙව් පිලට එරෙහිව ඇරැඹි පළමු ටෙස්ට් තරගයේ දිවා ආහාරය සඳහා තරගය නිමා කරන විට මන්දගාමී වුවත් සාර්ථක අඩිතාලමක් එක් කිරීමට ආරම්භක පිතිකරුවෝ සමත්වූහ. උදෑසන වරුව සඳහා වෙන්වූ පන්දුවාර 27 දී  ශ්‍රී ලංකාව ලකුණු 61 ක් ලබා සිටින්නේ කිසිවකු නොදැවීය.

ඒ අතරින් ලකුණු 32 ක් ලබා ගත් නායක දිමුත් කරුණාරත්න වැඩිම ලකුණු ලාභියා බවට පත්ව සිටියේය. පන්දු 75 කදී ලබාගත් එම ඉනිම මනරම් කවර් ඩ්‍රයිව් පහරකින් සහ පුල් පහරකින් ලබාගත් හතරේ පහර 2 ඇතුළුව හතරේ පහර 3 ක් එල්ල කර තිබුණේය. ළහිරු තිරිමාන්න නොමැතිවීම නිසා පිතිකරණ අනුපිළිවෙළේ උසස්වීමක් ලබා සිටින පැතුම් නිස්සංක නායකයාට අනගි සහායක් ලබා දෙමින් ලකුණු 25 ක් ලබා සිටියි. පන්දු 90 කට මුහුණ දී තිබූ නිස්සංක සිය ඉනිමට හතරේ පහර 2කින් වර්ණවත් කර ගත්තේය.

පළමු කඩුල්ලේ සම්බන්ධතාවය බිඳ දැමීම සඳහා කොදෙව් නායක ක්‍රේග් බ්‍රැත්වයිට් පන්දු යවන්නන් හය දෙනෙකු යොදා ගත් අතර විනිසුරු විමසීම වෙනුවෙන් ඉනිමකට හිමි අවස්ථා 3 න් 2 ක්ද අහිමික කරගත්තේය. මෙම තරගයේදී කොදෙව් පිල වෙනුවෙන් ටෙස්ට් වරම් හිමිකරගත් ජෙරමි සොලසානෝට නම් පළමු දිනය සුභදායක එකක් නොවීය. පිතිකරු තුළට දඟ කැවී එන පන්දුවට උඩ පන්දුවක් ලබා ගැනීමේ අපේක්ෂාවෙන් සොලසානෝව ෂෝට් ලෙග් ස්ථානයේ රඳවා සිටියදී දිමුත් කරුණාරත්න එල්ල කරන පහර සොලසානෝගේ හිසේ වැදුණා පමණක් නොව ඔහුව වහාම රෝහල් ගත කිරීමට සිදුවිය. ජොමෙන් වොරිකන් තණතීරුවේ මැද වැදී ආ දුර්වල පන්දුවට එල්ල කරන ලද වේගවත් පහර සොලසානෝගේ හිස් ආවරණයේ වැදුණද පහරේ වේගවත් භාවය හේතුවෙන් ඔහු බිම ඇද වැටිණ. කෙසේ වෙතත් වෛද්‍ය කණ්ඩායමේ සහයෝගය ඇතිව සොලසානෝව රෝහල් ගත කිරීමට පියවර ගත් අතර එහිදී ඔහු ස්කෑන් පරීක්ෂණයකට භාජනය වී තිබේ.

තරගයේ තීරණයට තීරණාත්මකම සාධකයක් වන පළමුව පන්දුවට පහර දීම සඳහා ශ්‍රී ලංකා නායකයා වාසනාව උදා කරගත්තේ කාසියේ වාසිය දිනා ගැනීම නිසාය. දඟ පන්දු යවන්නන්ට වඩාත් උචිත තණතීරුවේදී 6 වැනි පන්දුවාරයේ සිට දඟ පන්දු යවන්නන් උපයෝගී කර ගැනීමට කොදෙව් නායකයා තීරණය කළේය. එහිදී පන්දුව රකීම් කෝන්වෝල්ට ලබා දුන් අතර නව පන්දුවෙන් වුවද ඉතා හොඳ දඟ කැවීමක් ලබා ගැනීමට ඔහු සමත්විය.

ලකුණු 14 ක් ලබා සිටි දිමුත් කරුණාරත්නගේ පිත්තේ පිටත දාරයේ වැදුණු පන්දුව ස්ලිප් ස්ථානයේ පන්දු රැකි ජෙරමි බ්ලැක්වුඩ් වෙත උඩ පන්දුවක් ලෙසින් ඇදී ගියද එය ගිලිහී යෑමෙන් තවදුරටත් පිටියේ රැඳී සිටීමට ශ්‍රී ලංකා නායකයා වාසනාවන්ත වූවේය.

තරගයට පෙර ශ්‍රී ලංකා නායකයා සඳහන් කළ ක්‍රීඩකයින් එකොළොස් දෙනාම අද තරගයට ක්‍රීඩා කරද්දී දෙපිළම ප්‍රධාන දඟ පන්දු යවන්නන් හය දෙනා බැගින් අවතීර්ණ වී සිටීම කැපී පෙනෙයි. ශ්‍රී ලංකාව වෙනුවෙන් වමත් දඟ පන්දු යවන්නන් දෙදෙනා වන ලසිත් ඇඹුල්දෙණිය සහ ප්‍රවීන් ජයවික්‍රමද ක්‍රීඩා කරද්දී දකුණත් පිට දඟ පන්දු යවන්නා ලෙස රමේෂ් මෙන්ඩිස් කණ්ඩායමට පැමිණ  සිටියි. ඔවුන්ට අමතරව දඟ පන්දු යවන්නකු ලෙස ධනංජය ද සිල්වාවද උපයෝගී කර ගැනීමට ශ්‍රී ලංකා නායකයාට අවස්ථාව උදාවී තිබේ. කොදෙව් කණ්ඩායම උත්තුංග දේහදාරී රකීම් කෝන්වෝල්, රොස්ටන් චේස් සහ ජොමෙල් වොරිකන් සිය ප්‍රධාන දඟ පන්දු යවන්නන් ලෙසින් යොදා ගෙන තිබේ.

ලකුණු සාරාංශය

ශ්‍රී ලංකාව පන්දුවාර 27 කදී ලකුණු 61 යි – (දිමුත් කරුණාරත්න 32*, පැතුම් නිස්සංක 25*)

Active filters

Recent Posts

  • ශ්‍රී ලංකාවෙන් ප්‍රසාද ලකුණක් ගිලිහෙයි
    නවසීලන්තයට එරෙහිව පැවැති පළමු එක්දින තරගයේදී නියමිත වේලාවට පන්දුවාර සංඛ්‍යාව යවා අවසන් කිරීමට අපොහොසත් වුණු ශ්‍රී ලංකා කණ්ඩායමට ලෝක කුසලාන සුපර් ලීග් ප්‍රසාද ලකුණු සටහනෙන් තවත් එක් ලකුණක් […]
  • මහේල නවසීලන්තයට නොයෑම ගැන ශ්‍රී ලංකා ක්‍රිකට් කරුණු පහදයි
    ශ්‍රී ලංකා ක්‍රිකට්හි ‘පුහුණු උපදේශකවරයා’ ලෙසින් කටයුතු කරන මහේල ජයවර්ධන ශ්‍රී ලංකා කණ්ඩායම සහභාගිවන සෑම සංචාරයකදීම ජාතික කණ්ඩායම සමඟ සංචාරයට සහභාගි නොවන බව ශ්‍රී ලංකා ක්‍රිකට් දැනුම් දී […]
  • යොවුන් පිලට අවසන් මහ තරග අවස්ථාව ගිළිහෙයි
    අබුඩාබි නුවර පැවැත්වෙන වයස අවුරුදු 19 න්  පහළ තුන්කොන් එක්දින ක්‍රිකට් තරගාවලියේ අවසන් මහ තරගයට සුදුසුකම් ලබා ගැනීම සඳහා ශ්‍රී ලංකා යොවුන් කණ්ඩායමට තිබූ අවසන් අවස්ථාව වූ ඇෆ්ගනිස්තානයට […]
  • දඹුල්ලේ අපරාජිත බව බිඳ වැටෙයි
    ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන නැෂනල් සුපර් ලීග් එක්දින තරගාවලියේදී දඹුල්ල පිලේ අපරාජිත බව බිද දැමූ ගෝල් ක්‍රීඩකයෝ කඩුලු 5ක ජයක් වාර්තා කළහ. දැනටමත් අවසන් මහා තරගයට […]
  • කැන්ඩි දෙවැනි වරටත් ජැෆ්නාට පරදී
    ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන නැෂනල් සුපර් ලීග් එක්දින තරගාවලියේදී දෙවැනි වරටත් කැන්ඩි පිල පරාජය කිරීමට ජැෆ්නා ක්‍රීඩකයෝ සමත් වූහ. කොළඹ සිංහල ක්‍රීඩා සමාජ ක්‍රීඩාංගණයේ   පැවති තරගයෙන් […]
LKR Sri Lankan rupee

Pin It on Pinterest