පන්දුවාර විස්සයි-20 ලෝක කුසලාන ක්‍රිකට් තරගාවලියේ සුපිරි කණ්ඩායම් 12 අතර තරග වටයේ ශ්‍රී ලංකා කණ්ඩායම සහභාගිවන අවසන් තරගය බවට පත්වන බටහිර ඉන්දීය කොදෙව් කණ්ඩායමට එරෙහි තරගයේදී කාසියේ වාසිය අහිමි වුවද පළමුව පන්දුවට පහර දීමේ අවස්ථාව ශ්‍රී ලංකා කණ්ඩායමට හිමිව තිබේ.
කාසියේ වාසිය ජයග්‍රහණය කිරීමෙන් පසු අදහස් දක්වා සිටි කොදෙව් නායක කිරන් පොලාර්ඩ්, පළමුව පන්දු යැවීම යනු සමස්ථ තරගාවලියේම ස්වභාවය බවට පත්ව තිබෙන බවත්, රාත්‍රී කාලයේදී පිණි සහිත තත්ත්වයෙන් එල්ලවිය හැකි බලපෑම අවම කරගැනීමේ අරමුණ ඇතිව පන්දුයැවීමට තීරණය කළ බව සඳහන් කර සිටියේය.
ශ්‍රී ලංකා නායක දසුන් ශානක අදහස් දක්වමින් සඳහන් කර සිටියේ, අබුඩාබි තණතීරුවේ පන්දුව හැසිරීම පිළිබඳව පැහැදිළි අවබෝධයක් තම කණ්ඩායම සතුව පවතින බවයි. මේ වන විට පවතින තත්ත්වයන් වල සියුම් වෙනසක් සිදුවී තිබෙන බවත්, තණතීරුව පිතිකරුවන්ට යෝග්‍යව හැසිරීමට පටන් අරගෙන තිබෙන බවද සඳහන් කර සිටි ශ්‍රී ලංකා නායකයා, පිතිකරණ අංශය ශක්තිමත්ව පැවැතියේ නම් ශ්‍රී ලංකා කණ්ඩායමට අවසන් කණ්ඩායම් 4 අතර තරග වටයට යෑමට හොඳින්ම අවකාශ තිබුණු බව සඳහන් කර සිටියේය.
ශ්‍රී ලංකා කණ්ඩායම අද තරගයේදී එක් වෙනස්කමක් සිදුකරමින් අවතීර්ණව සිටින අතර වේග පන්දු යවන ළහිරු කුමාර වෙනුවට වමතින් වේග පන්දු යවන බිනුර ප්‍රනාන්දුව අවසන් 11 දෙනා අතර කැඳවා තිබේ.
ශ්‍රී ලංකාව – කුසල් පෙරේරා, පැතුම් නිස්සංක, චරිත් අසලංක, අවිෂ්ක ප්‍රනාන්දු, භානුක රාජපක්ෂ, දසුන් ශානක (නායක), චාමික කරුණාරත්න, වනිඳු හසරංග, දුෂ්මන්ත චමීර, මහීෂ් තීක්ෂණ, බිනුර ප්‍රනාන්දු.
බ.ඉ.කොදෙව් – ක්‍රිස් ගේල්, එවින් ලුවිස්, රොස්ටන් චේස්, නිකොලොස් පූරඑාන්, ශිම්රන් හෙට්මේයර්, කිරන් පොලාර්ඩ් (නායක), ඇන්ඩ්‍රෙ රසල්, ජේසන් හෝල්ඩර්, ඩ්වයින් බ්‍රාවෝ, අකීල් හොසේන්, රවී රාම්පෝල්.
