By Chamila Karawita

ආසියානු කළාපයේ රටවල් අතර දක්ෂතා මැන බැලෙන ආසියානු කුසලාන ක්‍රිකට් තරගාවලිය අගෝස්තු මස 27 වැනිදා සිට සැප්තැම්බර් 11 වැනිදා දක්වා ශ්‍රී ලංකාවේ පැවැත්වෙන බවට ආසියානු ක්‍රිකට් කවුන්සිලය මාර්තු 19 වැනිදා නිල වශයෙන් නිවේදනය කළේය. කොළඹදී අද පැවැති ආසියානු ක්‍රිකට් කවුන්සිලයේ වාර්ෂික මහ සභා රැස්වීමේදී මේ බව නිල වශයෙන් ප්‍රකාශයට පත් කෙරිණ. ඒ අනුව ආසියානු කුසලාන ක්‍රිකට් තරගාවලියක් මෙවර පැවැත්වෙන්නේ ආසන්න වශයෙන් වසර 4 කට පසුව වීම කැපී පෙනෙයි.

ඉන්දීය ජාතික ජේ ෂා මහතාගේ ප්‍රධානත්වයෙන් පැවැති මෙම වාර්ෂික මහ සභා රැස්වීමේදී ඉදිරි 2024 වසරේ පැවැත්වීමට නියමිත වාර්ෂික මහ සභා රැස්වීම දක්වා වූ කාල සීමාවේදී ද ඒ මහතාම කටයුතු කරනු ලබනු බව එම කවුන්සිලය නිවේදනයක් නිකුත් කරමින් සඳහන් කර සිටියි. ශ්‍රී ලංකා ක්‍රිකට් ආයතන සභාපති ශම්මි සිල්වා මහතා ඇතුළත් වත්මන් විධායක කමිටුවද 2024 දක්වා ජේ ෂා මහතා සමඟ කටයුතු කරනු ඇත.

ඉදිරි කාලය ඇතුළත ආසියානු කළාපයේ කාන්තා ක්‍රිකට් ක්‍රීඩාව නඟා සිටුවීම වෙනුවෙන් කටයුතු කිරීමට නියමිත බව එම සභාව ඇමැතූ සභාපති ජේ ෂා මහතා සඳහන් කර සිටියේය. එහදී ආසියානු කළාපීය තරගාවලියක් පැවැත්වීම සඳහා වැඩි උනන්දුවක් ගනු ලබන බවද ඒ මහතා වැඩි දුරටත් අවධාරණය කර සිටි බව එම නිවේදනයේ වැඩිදුරටත් සඳහන් වේ.

මේ අතර 2000 වසරේ සටම ආසියානු ක්‍රිකට් කවුන්සිලයේ සම සාමාජිකයකු ලෙසින් සිටි කටාර් රාජ්‍යයටද මේ වසරේ සිට ආසියානු ක්‍රිකට් කවුන්සිල පූර්ණ සාමාජිකත්වය ලබාදීමද මෙහිදී සිදුවිය.

ආසියාවේ ප්‍රභලම රටවල් වන ඉන්දියාව, ශ්‍රී ලංකාව, පාකිස්තානය, බංග්ලාදේශය සහ ඇෆ්ඝගනිස්තානය යන රටවල ක්‍රිකට් පාලක මණ්ඩල නියෝජනය කරමින් මෙම වාර්ෂික මහ සභා රැස්වීමට සහභාගිවූ අතර ශ්‍රී ලංකාව නියෝජනය කරමින් ශ්‍රී ලංකා ක්‍රිකට් වර්තමාන සභාපති ශම්මි සිල්වා මහතා සහභාගිවිය.