By Chamila Karawita

පොදුරාජ්‍ය මණ්ඩලයීය ක්‍රීඩා උළෙලට සහභාගිවීම සඳහා වන ශ්‍රී ලංකා කාන්තා කණ්ඩායම අද (25 දා) මධ්‍යාහ්නයේදී එංගලන්තයේ බර්මිංහැම් නුවර බලා පිටත්ව ගියේය. චමරි අතපත්තුගේ නායකත්වයෙන් යුතු ශ්‍රී ලංකා කාන්තා කණ්ඩායම සාමාජිකාවන් 15 දෙනෙකුගෙන් සමන්විත විය.

මෙම තරගාවලියේදී ශ්‍රී ලංකාවතරග වදිනු ලබන කාණ්ඩයට එංගලන්ත්‍ය, නවසීලන්තය සහ දකුණු අප්‍රිකාව යන ප්‍රබල ප්‍රතිවාදී රටවල් ඇතුළත්ව සිටිති. මැලේසියාවේ පැවැති සුදුසුකම් ලැබීමේ තරගාවලියේදී ශූරියන් බවට පත්වූ ශ්‍රී ලංකා කාන්තා ක්‍රීඩිකා‌වෝ මෙම පොදුරාජ්‍ය මණ්ඩල තරග වරමට ක්‍රීඩා කිරීම සදහා වරම් ලබා ගත්හ.

තරගාවලියට පිටත්ව යෑමට පෙර අදහස් දක්වා සිටි ශ්‍රී ලංකා කාන්තා පිලේ නායිකා චමරි අතපත්තු සදහන් කර සිටියේ, ශ්‍රේණිගත කිරීම් යටතේ ඉදිරියෙන් සිටින කණ්ඩායම් මූලික තරග වටය යටතේ තරග කිරීමට සිදු වුවද ශ්‍රේණිගත කිරීම් යනු හුදෙක් අංකයක් පමණක් බවත්, වඩා වැදගත් වනුයේ එදින වැඩි දස්කම් දැක්වීමට හැකියාව ලැබුණහොත් තරගයේ වාසිය තම කණ්ඩායම සතු වන බවයි.

“ඇත්තටම ගත්තොත් අපි තරග වදින කාණ්ඩයේ ශ්‍රේණිගත කිරීම්හි ඉදිරියෙන් සිටින කණ්ඩායම් සමග තමයි අපිට තරග වදින්න සිදුවෙලා තියෙන්නේ.  මම හිතන්නේ ශ්‍රේණිගත කිරීම් කියන්නේ අංක පමණයි. වඩාත් වැදගත් වන්නේ එදා දිනයේදී හොඳින් දක්ෂතා දැක්වීමට සමත් වුවහොත් අපිට සාර්ථක ප්‍රතිඵල අත්කර ගැනීමට හැකියාව ලැබෙනවා” යැයි චමරි පවසන්නීය.

‘බී’ කාණ්ඩය යටතේ ශ්‍රී ලංකාව මේ මස 30 වැනිදා ප්‍රබල එංගලන්තය සමාරම්භයේදී මුණ ගැසෙනු ඇත. අනතුරුව අගෝස්තු මස 02 වැනිදා නවසීලන්තයට එරෙහිව තරග වදින ශ්‍රී ලංකාව අගෝස්තු මස 04 වැනිදා දකුණු අප්‍රිකාව හමුවේ කඳවුරු බඳිනු ඇත. තරගාවලියේ ස්වභාවය වන්නේ මූලික වටයේ දක්වනු ලබන දක්ෂතා අනුව අවසන් කණ්ඩායම් 4 අතරට සුදුසුකම් ලබන කණ්ඩායම් තීරණය වනු ඇත.

තරගාවලියට පිටත්ව යෑමට පෙර ඉතා හොද නේවාසික පුහුණු සැසියකට සහාගිවුණු බව ද අවධාරණ්‍ය කර සිටි කාන්තා ක්‍රිකට් නායිකාව ඉන්දියාවට එරෙහිව ඉකුත්දා සහභාගිවුනු තරගාවලිවලදී හොද පන්නරයක් ලබා ගත් බවද සඳහන් කර සිටියාය. “මම හැම දාම කියනවා වගේ අපේ පන්දු යැවීම ඉතා ඉහළ මට්ටමක පවතිනවා. පිතිහරඹය තමයි අපිට හදා ගන්න තියෙන්නේ. ඒ නිසා මේ තරගාවලියේදී අපේ පිතිකාරිණියන්ට ලකුණු අතරට පැමිණිමට හැකියාව ලැබුණොත් අපිට තරගාවලියේ ඉදිරියට යන්න ගොඩක් අවස්ථාව තියෙනවා” යැයි චමරි සදහන් කර සිටියාය.