අන්තර්ජාතික ක්‍රිකට් සභාව විසින් ජූලි මසදී නම් කිරීමට නියමිත එම මාසයේ ක්‍රීඩකයා සම්මානය සඳහා ශ්‍රී ලංකා කණ්ඩායමේ වමත් දඟ පන්දු යවන ක්‍රීඩක ප්‍රභාත් ජයසූරියව කෙටි ලැයිස්තුගත කර තිබේ. ඔහුට අමතරව එංගලන්ත කණ්ඩායමේ ජොනී බෙයාර්ස්ටෝ සහ ප්‍රංශ ක්‍රීඩක ගුස්තාව් මැකියෝන් ඇතුළත්ව සිටිති.

වමතින් දඟ පන්දු යවන ප්‍රභාත් ජයසූරිය ඔස්ටේලියාවට එරෙහිව ගාල්ලේදී පැවැති දෙවැනි ටෙස්ට් තරගයේදී මංගල ටෙස්ට් වරම් දිනාගත්තේය. සිය මංගල ටෙස්ට් තරගයේ පළමු ඉනිමේදී ලකුණු 118 කට කඩුලු 6 ක් සහ දෙවැනි ඉනිමේදී ලකුණු 59 කට කඩුලු 5 ක් වශයෙන් අමතක නොවන ආරම්භයක් එක් කර ගැනීමට ජයසූරිය සමත්වූවේය. ජයසූරියගේ දක්ෂතාවය නිසා ශ්‍රී ලංකාව දෙවැනි ටෙස්ට් තරගයෙන් ඉනිමකින් සහ ලකුණු 39 ක ජයක් වාර්තා කරමින් තරගාවලීය 1-1 ක් ලෙස සමව අවසන් කර ගැනීමට අවස්ථාව උදා වූවේය.

අනතුරුව පාකිස්තානයට එරෙහිව පැවැති තරගාවලියේදීද සිය දක්ෂාතවය එලෙසම පවත්වාගත් ජයසූරිය පළමු ඉනිමේදී ලකුණු 82 කට කඩුලු 5 ක් දවා ගනිමින් පිට පිට ටෙස්ට් ඉනිම 3 කදී කඩුලු 5 ක් දවා ගැනීමට සමත්වූවේය. පිට පිටම ඉනිම 4 කදී කඩුලු 5 ක් දවා ගැනීමේ ආසන්නම අවස්ථාවකට ජයසූරය එළැඹි නමුත් එම දෙවැනි ඉනිමේදී ඔහුගේ පන්දු යැවීම සටහන් වූයේ ලකුණු 135 කට කඩුලු 4 ක් වශයෙනි.

කෙසේ වෙතත් යළිත් දෙවැනි ටෙස්ට් තරගයේදී සිය උපරිමය පෙන්නුම් කළ වමත් දඟ පන්දු යවන්නා පළමු ඉනිමේදී කඩුලු 3 ක් සහ දෙවැනි ඉනීමේදී ලකුණු 117 කට කඩුලු 5 ක් දවා ගනිමින් ඉනිම 6 කදී කඩුලු 5 කට වැඩියෙන් දවාගත් අවස්තා 5 ක් සනිටුහන් කරගත්තේ සිය පෞද්ගලික ටෙස්ට් කඩුලු සංඛ්‍යාව ටෙස්ට් තරග 3 කදී 29 ක් දක්වා ඉහළ දමා ගනිමිනි.