එංගලන්ත වයස අවුරුදු 19 න් පහළ පිලට එරෙහිව පැවැත්වෙන සිව්දින ටෙස්ට් තරගයේ තෙවැනි දිනට තරගය නිමා කරන විට සිය පළමු ඉනිම ක්‍රීඩා කරමින් සිටින ශ්‍රී ලංකා කණ්ඩායම කඩුලු 8 කට ලකුණු 480 ක දැවැන්ත ලකුණු සංඛ්‍යාවක් වාර්තා කිරීමට සමත්විය.

එංගලන්ත යොවුන් පිල පළමු ඉනිම වෙනුවෙන් රැස් කරන ලද ලකුණු 381 කට පිළිතුරු ඉනිම ක්‍රීඩා කරමින් සිටින ශ්‍රී ලංකාව මේ වන විට තවත් කඩුලු 2 ක් ඇතැතිව ලකුණු 99 ක් පළමු ඉනිමේ පෙරමුණට පත්ව සිටියි.

ශ්‍රී ලංකාව වෙනුවෙන් අනගි ඉනිමක් ක්‍රීඩා කළ ෂෙවෝන් ඩැනියල් ලකුණු 155 ක් ලබා දැවැන්ත ලකුණු සංඛ්‍යාවක් ලබා ගැනීම සදහා කණ්ඩායමේ කොදු නාරටිය බවට පත්වූවේය. පන්දු මිනිත්තු 455 ක් පුරා කඩුල්ලේ රැදී සිටි වමත් පිතකිරුවා සිය සුවිශේෂී ඉනිම වෙනුවෙන් හයේ පහරකුත් තවත් හතරේ පහර 25 කුත් සිය ඉනිමට ඇතුළත් කර ගත්තේය. ලකුණු 92 ක් ලබා සිටියදී තෙවැනි දිනය ඇරැඹූ ෂෙවෝන් ඩැනියල් ලකුණු 147 සිට හතරේ පහරක් එල්ල කරමින් ලකුණු 150 සීමාව ඉක්මවා යෑමට සමත්වූවේය. සිව්වැනි පිතිකරුවා ලෙසින් දැවී යන විට ඩැනියල් සිය ඉනිම සදහා පන්දු 237 කට මුහුණ දී තිබුණේය. ඔහුට අමතරව දෙවැනි දින අවසනදී ලකුණු 37 ක් ලබා ඩැනියෙල් සමග කඩුල්ලේ රැදී සිටි පවන් පතිරාජ ලකුණු 55 ක් ලබා ගත්තේය.

මැද පෙළින් පන්දුවට පහර දුන් නායක රවීන්ද සිල්වා පන්දු 177 කට මුහුණ දෙමින් ලකුණු 65 ක් ලබා සිටින්නේ සිව්වැනි දිනය වූ හෙට දිනයේදීත් යළිත් පන්දුවට පහර දීමේ අවස්තාව උදාකර ගනිමිනි. ඔහුට අමතරව අංක 9 පිතිකරු ස්ථානයෙන් පන්දුවට පහර දුන් විනුජ රන්පුල් ලකුණු 65 ක් ලබා ගැනීම ශ්‍රී ලංකා යොවුන් පිලට ලකුනු 500 සීමාව ආසන්නයට පැමිණීමට ප්‍රධාන ලෙසින් දායකත්වය දැක්වූයේ.

හෙට තරගයේ සිව්වැනි සහ අවසන් දිනයයි.

එංගලන්ත යොවුන් පිල පන්දුවාර 122.2 කදී සියලු දෙනා දැවී ලකුණු 381 – (මැතිව් හර්ස්ට් 116, හැරී සිං 104, බෙන් මැක්කෙනි 22, ජේම්ස් සේල්ස් 52, ස්ටැන්ලි මැක්ඇල්න්ඩන් 20, දුවිඳු රණතුංග 58/2, සහන් මිහිර 58/2, වනුජ සහන් 67/2, රවීන් ද සිල්වා 56/2)

ශ්‍රී ලංකා යොවුන් පිල පළමු ඉනිම පන්දුවාර 145 කදී කඩුලු 8 ට නකුණු 480 යි – (ෂෙවෝන් ඩැනිනයල් 155, අබිෂේක් ලියනාරච්චි 49, පවන් පතිරාජ 55, රනුද සෝමරත්න 37, රවීන් ද සිල්වා නොදැවී 65, විනජු රන්ුල් 65, බෙන්ජමින් ක්ලිෆ් 85/2, බර්ටි ෆෝර්මන් 100/2)