ශ්‍රී ලංකා ක්‍රිකට් ආයතනයේ සංවිධානයෙන් එක්සත් අරාබි එමීර් රාජ්‍ය‌යේ අද (27 දා) ආරම්භ වුණු ආසියානු කුසලාන ක්‍රිකට් තරගාවලියේ සමාර්ම්භක තරගයේදී ශ්‍රී ලංකාව වෙනුවෙන් විස්සයි-20 වරම් දිනා ගැනීමට වේග පන්දු යවන්නන් වන මතීෂ පතිරණ සහ ඩිල්ෂාන් මදුශංක සමත්වූහ.

මෙම තරගයේ කාසියේ වාසිය තමන් සතු කරගත් ඇෆ්ගනිස්තාන නායක මොහොමඩ් නබී පළමුව පන්දුවට පහර දීම සඳහා ශ්‍රී ලංකා කණ්ඩායමට ආරාධනා කර සිටියේය. ඒ අනුව ශ්‍රී ලංකා කණ්ඩායම අද තරගයට ආරම්භක පිතිකරුවන් තිදෙනා වුණු පැතුම් නිස්සංක, කුසල් මෙන්ඩිස් සහ ධනුෂ්ක ගුණතිලක යන තිදෙනාම කැඳවා තිබෙන අතර එහිදී කුසල් සහ පැතුම් ඉනිම ආරම්භ කරනු ඇත. ගුණතිලක අංක 4 පිතිකරණ ස්ථානයෙන් ක්‍රීඩා කරන්දී ධනංජය ද සිල්වාට අවසන් 11 දෙනා අතර ස්ථානයක් හිමිවී නොමැත.

දකුණතින් වේග පන්දු යවන මතීෂ පතිරණ ලසිත් මාලිංගගේ ඉරියව්ව සමාන ඉරිය්වකින් පන්දු යවන බැවින් බොහෝ දෙනාගේ අවධානයට දිනා ගැනීමට සමත්ව සිටින පන්දු යවන්නෙකි. ඔහු සමඟ අද දිනයේදී විස්සයි-20 වරම් දිනාගත් ඩිල්ෂාන් මදුශංක වමතින් වේග පන්දු යවන්නේය. ඒ අනුව ඔවුන් දෙදෙනා ශ්‍රී ලංකාව වෙනුවෙන් විස්සයි-20 වරම් දිනාගනු ලැබූ 95 සහ 96 වැනි ක්‍රීඩකයෝ වෙති.

ඩුබායි ජාත්‍යන්තර ක්‍රීකට් ක්‍රීඩාංගණයේ පැවැත්වෙන මෙම තරගය ඇෆ්ගනිස්තානු විස්සයි-20 තරගවල 100 වැනි අන්තර්ජාතික තරගය වීමද විශේෂත්වයකි.

ශ්‍රී ලංකා කණ්ඩායම – දනුන් ශානක (නායක), පැතුම් නිස්සංක, කුසල් මෙන්ඩිස්, චරිත් අසලංක, ධනුෂ්ක ගුණතිලක, භානුක රාජපක්ෂ, වනිඳු හසරංග, චාමික කරුණාරත්න, මහීෂ් තීක්ෂණ, ඩිල්ෂාන් මදුශංක, මතීෂ පතිරණ.

ඇෆ්ගනිස්තානු කන්ඩායම – මොහොමඩ් නබී (නායක), හස්රතුල්ලා සසායි, රාමනුල්ලා ගුර්බාස්, ඊබ්‍රහීම් සද්‍රාන්, කරීම් ජනාට්, නජිබුල්ලා සද්‍රාන්, රෂීඩ් ඛාන්, හස්මතුල්ලා ඔර්මසායි, නවීන් උල්හක්, මුජිබුර් රහ්මන්, ෆසාක් හක් ෆ්රෑකි

–