ආසියානු කුසලාන ක්‍රිකට් තරගාවලිය යටතේ ඇෆ්ගනිස්තානය සහ පාකිස්තානය අතර තරගය අවසන් වීමත් සමඟ 2022 ආසියානු කුසලාන තරගාවලියේ අවසන් මහ තරගයට සුදුසුකම් ලබා ගැනීමට ශ්‍රී ලංකා කණ්ඩායම සමත්විය. සුපිරි කණ්ඩායම් 4 අතර තරග වටයේ මෙතෙක් සහභාගිවුණු තරග 2ම ජය ගැනීමට සමත්ව සිටින ශ්‍රී ලංකාව පිල ලබන 11 වැනිදා අවසන් මහ තරගයේදී පාකිස්තානු පිල මුණ ගැසෙනු ඇත.

සුපිරි කන්ඩායම් 4 අතර තරග වටයේ දෙපිළ මේ තෙක් මුණ නොගැසුණු නමුත් ඊට පෙර සහභාගිවුණු 2 ම ජය වාර්තා කරමින් දෙපිළම අවසන් මහ තරග අවස්ථාවට සුදුසුකම් ලබා ගැනීමට සමත්වීම කැපී පෙනෙයි. අදාළ සුපිරි කණ්ඩායම් 4 අතර තරග වටයේදී ශ්‍රී ලංකාවත්, පාකිස්තානයත් හෙට (09 දා) දිනයේදී මුණ ගැසෙන නමුත් එම තරගයේ ජය – පරාජය අවසන් මහ තරගය සඳහා කිසිදු බලපෑමක් නොමැත. එබැවින් මෙම තරගයේදී අවසන් මහ තරගය පෙර පුහුණු තරගයක් ලෙසින් යොදා ගැනීමේ හැකියාව පවතිනු ඇත.

පාකිස්තානය සහ ශ්‍රී ලංකාව හමුවේ ලද පරාජයන් හේතුවෙන් ඉන්දියාවටද, සහභාගිවුණු තරග 3 ම පරාජයට පත්වීම නිසා ඇෆ්ගනිස්තානු පිලටද අවසන් මහ තරග අවස්ථාව පිළිබඳ බලාපොරොත්තු අත හැර යළිත් සිය රට බලා පිටත්ව යනු ඇත.

ඒ අනුව ඉරිදා පැවැත්වීමට නියමිතව තිබෙන අවසන් මහ තරගයට පෙර සිය හොඳම සංයුතිය මනා ලෙස සකසා ගැනීම සදහා හෙට පැවැත්වෙන හොඳම අවස්ථාවක් සලසා දී තිබේ. මෙහිදී ශ්‍රී ලංකා කණ්ඩායමක් ආසියානු කුසලාන තරගාවලියක අවසන් මහ තරගයකට සුදුසුකම් ලබා සිටින්නේ වසර 8 කට පසුව වේ. ඔවුන් අවසන් වරට 2014 වසරේදී පාකිස්තානු පිලට එරෙහිව අවසන් මහ තරගයට ක්‍රීඩා කළා පමණක් නොව පස්වැනි වතාවටත් ආසියානු ශූරයින් බවටද පත්විය.