ගාල්ල ජාත්‍යන්තර ක්‍රීඩාංගණයේ අද (16 දා) ඇරැඹි පළමු ටෙස්ට් තරගයේදී සිත් සේ ලකුණු රැස් කළ ශ්‍රී ලංකා පිතිකරුවෝ අයර්ලන්තයට එරෙහි පළමු දිනයේදී තරගය නිමා කරන විට කඩුලු 4 ක් දැවී ලකුණු 386 ක් රැස් කර ගැනීමට සමත්වූහ.  එම ලකුණු 386 න් ලකුණු 319 ක්ම නායක දිමුත් කරුණාරත්න සහ කුසල් මෙන්ඩිස් දෙදෙනා විසින් රැස්කර ගන්නා ලද ලකුණු විය.

දිනය නිමා වන විට සැදෑ මුරකරු ලෙසින් පැමිණි ප්‍රභාත් ජයසූරිය ලකුණු 12 ක්ද දිනේෂ් චන්දිමාල් ලකුණු 18 ක්ද ලබා කඩුල්ලේ රැදී සිටියහ.

දිනයේ සුවිශේෂී ඉනිම් ක්‍රීඩා කරන ලද පිතිකරුවන් වූ දිමුත් කරුණාරත්න දිනය අවසානයට මිනිත්තු කීපයකට පෙර දැවී ගියේ සිය ද්විත්ව ශතකයට ලකුණු 21ක් ඈතින් සිටියදීය. ආධුනික අයර්ලන්ත පිල හමුවේ වුවද ඉතාමත් වෙහෙසකට පිතිහරඹයක නිරත වුණු කරුණාරත්න තම ලකුණු 179 සඳහා පන්දු 235 කට මුහුණ දුන්නේය. හතරේ පහර 15 කින් පමණක් සිය ඉනිම සරසා ගැනීමට නායකයා වග බලා ගත්තේය. දිමුත්ගේ කඩුල්ල දවා ගැනීම වෙනුවෙන් අයර්ලන්ත පිලට දෙවැනි නව පන්දුව ලබා ගන්නා තෙක් බලා සිටීමට සිදුවිය. කෙසේ වෙතත් මාක් අඩයර්ගේ පන්දුවකට දිමුත්ගේ පිතේ දාරයේ වැදී ගිය උඩ පන්දුව කඩුලු රකින්නා අතින් රැක ගන්නා විටත් ශ්‍රී ලංකා ඉනිම ලකුණු 373 ක් ලෙසින් සටහන් විය. දැවී යන විටත් දිමුත් සිය 15 වැනි ශතකය රැස් කරගෙන සිටියේය.

ඔහුට අනගි සහායක් ලබා දුන් කුසල් මෙන්ඩිස් ලකුණු 181 ක් සම්බන්ධතාවක් පැවැත්වූයේ තම නම ඉදිරියෙන් ලකුණු 140 ක් රඳවා ගනිමිනි. ඇන්ඩි මැක්බර්න්ගේ පන්දුවකට හයේ පහරක් එල්ල කළ මෙන්ඩිස් සිය අර්ධ ශතකය සම්පූර්ණ කරගත් නමුත් ඔහුට කළින් දිමුත් ශතකය වාර්තා කළේය. මොවුන් දෙදෙනා අතර දෙවැනි කඩුල්ලේ සම්බන්ධතාව පන්දු 356 කදී ලකුණු 281 ක් විය. ඇන්ජලෝ මැතිව්ස්ට අද දිනයේදී ලකුණු ලබා ගැනීමට නොහැකි වූ අතර ඔහු මුහුණ දුන් තෙවැනි පන්දුවේදීම දැවී ගියේය.

ජෝර්ඩ් ඩොකරල්ගේ පන්දුවකට කඩුල්ල මුවා කිරීමේ වරදකට හසුව මෙන්ඩිස් දැවී යද්දී තම ඉනිම හයේ පහරකින් සහ හතරේ පහර 18 කින් වර්ණවත් කරගෙන සිටියේය. අද දිනයේදී ආරම්භක පිතිකරුවාගේ වගකීම කරට ගත් නිශාන් මදුශ්කට රැස් කරගත හැකි වූයේ ලකුණු 29 ක් පමණි. ඒ වන විටත් නායකයා සමඟ පළමු කඩුල්ල වෙනුවෙන් ලකුණු 64 ක් එක් කිරීමට මදුශ්ක දායකත්වය දැක්වූවේය.

හෙට තරගයේ දෙවැනි දිනයයි.

ශ්‍රී ලංකාව පන්දුවාර 88 කද ීකඩුලු 4 ක් දැවී ලකුණු 386 යි – (දිමුත් කරුණාරත්න 179, නිශාන් මදුශ්ක 29, කුසල් මෙන්ඩිස් 140, ඇන්ජලෝ මැතිව්ස් 00, දිනේෂ් චන්දිමාල් 18*, ප්‍රභාත් ජයසූරිය 12*, ජෝර්ජ් ඩොකරල් 65/1, කර්ටිස් කැම්පර් 44/1, මාක් අඩයර් 66/1)