එක්දින සහ විස්සයි-20 තරගාවලියට සහභාගිවීම සඳහා ශ්‍රී ලංකාවට පැමිණ සිටින බංග්ලාදේශ කාන්තා කණ්ඩායමට හිමි පුහුණු එක්දින තරගය සඳහා ක්‍රීඩා කිරීමට නම් කරන ලද ශ්‍රී ලංකා ක්‍රිකට් සභාපතිවරයාගේ කණ්ඩායමේ නායිකාව ලෙස සත්‍යා සංදීපනීව නම් කර තිබේ.
ලබන 29 වැනිදා ආරම්භ වන එක්දින තරගාවලියට පෙර සුදානමක් ලෙසින් පැවැත්වෙන මෙම තරගය කොළඹ ක්‍රීඩා සමාජ පිටියේදී පැවැත්වේ.
නම් කරන ලද 15 දෙනෙකුගෙන් සමන්විත කණ්ඩායමට පාසල් වියේ පසුවන ක්‍රීඩිකාවන් දෙදෙනකු ඇතුළත්ව සිටීම විශේෂත්වයකි. ඉකුත් දා පැවැති වයස අවුරුදු 19 න් පහළ ලෝක කුසලාන ක්‍රිකට් තරගාවලිය නියෝජනය කරන ලද දෙව්මි විහංගා සහ නෙත්මි සේනාරත්න එම ක්‍රීඩිකාවෝ වෙති.
ඊට අමතරව සෙසු ක්‍රීඩිකාවන් සියල්ලම නැගී එන කණ්ඩායම් සහ ශ්‍රී ලංකා ‘ඒ’ කණ්ඩායම් නියෝනියෝජනය කරමින් අත්දැකීම් ලබා සිටින ක්‍රීඩිකාවෝ වෙති. නායිකාව වන සත්‍යා සංදීපනී, රත්ගම දේවපතිරාජ විදුහලින් ක්‍රිකට් ක්‍රීඩාවට පිවිස සිටියි. තුන් ඉරියව් ක්‍රීඩිකාවක් වන සත්‍යා දකුණතින් පන්දුවට පහර දෙන්නීය.
ශ්‍රී ලංකා ක්‍රිකට් සභාපතිගේ කණ්ඩායම – සත්‍යා සංදීපනී (නායිකා), උමේෂා තිමාෂිනී, කෞෂානි නුත්‍යාංගනා (උප නායිකා), පියුමි වත්සලා, සචිනි නිසංසලා, මදුෂිකා මෙත්තානන්ද, නෙත්මි මෙත්තානන්ද, නෙත්මි සේනාරත්න, තාරුකා ෂෙහානි, නිමේෂා මදුශානි, මල්කි මදාරා, අමාධි විජේසිංහ, සඳුනි නිසංසලා, නිලක්ෂණා සඳමිනී, නවෝද්‍යා නෙත්මි
