දෙවැනි වරටත් පවත්වනු ලබන නැෂනල් සුපර් ලීග් එක්දින ක්‍රිකට් තරගාවලියේ ශූරයින් තේරීම වෙනුවෙන් අද (06 දා) කොළඹ ආර්. ප්‍රේමදාස ක්‍රීඩාංගණයේ පැවැත්වෙන අවසන් මහ තරගය නොමිලේ නැරඹීමේ අවස්ථාව ක්‍රීඩා ලෝලීන්ට උදාකර දීමට ශ්‍රී ලකා ක්‍රිකට් ආයතනය විධිවිධාන යොදා තිබේ. දිවා/රාත්‍රී තරගයක් ලෙසින් විදුලි ආලෝක මධ්‍යයේ පැවැත්වෙන මෙම අවසන් මහ තරගය ප.ව. 2.30 ට ආරම්භ වේ.

මිනෝද් භානුකගේ නායකත්වයෙන් යුතු දඹුල්ල කණ්ඩායමත් ජනිත් ලියනගේගේ නායකත්වයෙන් යුතු ‌ජැෆ්නා කණ්ඩායමත් අද අවසන් මහ තරගයේදී එකිනෙකා මුණ ගැසෙනු ඇත. මෙහිදී තරග නැරඹීම සඳහා ‘ඒ’ සහ ‘බී’ යන ප්‍රේක්ෂකාගාර ප.ව. 1.30 සිට විවෘතව පවතිනු ඇත.