ජපාන ක්‍රිකට් සංගමයේ ආරාධනාවක් මත ජපානයේ තරග සංචාරයක් සඳහා සහභාගිවන ශ්‍රී ලංකා නැගී එන කණ්ඩායමේ නායකයා ලෙස ඩෙලන් පීරිස් නම් කර තිබේ. පන්දුවාර විස්සයි-20 තරග 5 ක් ඇතුළත් මෙම තරගාවලිය, ජපාන ජාතික කණ්ඩායමට එරෙහිව පැවැත්වෙනු ඇත.

15 දෙනෙකුගෙන් සමන්විත ශ්‍රී ලංකා කණ්ඩායම මැයි මස 08 වැනිදා ජපානය බලා පිටත්ව ගියේය. තරගාවලිය මැයි මස 10, 11, 13, 14 සහ 15 යන දිනයන්හිදී තෝකියෝ නුවර සානෝ ජාත්‍යන්තර ක්‍රීඩාංගණයේදී පැවැතවෙනු ඇත.

එළැඹෙන වසරේ පැවැත්වීමට නියමිත විස්සයි-20 ලෝක කුසලාන ක්‍රිකට් තරගාවලියට සුදුසුකම් ලබා ගැනීම වෙනුවෙන් ක්‍රියාත්මක නැගෙනහිර ආසියානු කලාපීය විස්සයි-20 අවසන් තරග වටය සදහා ජපාන කණ්ඩායම මේ වන විටත් සුදුසුකම් ලබා සිටින අතර ඊට පෙරහුරුවක් ලෙස මෙම තරගාවලිය යොදා ගැනීම ජපාන ක්‍රිකට් සංගමයේ බලාපොරොත්තුව වී තිබේ.

වයස අවුරුදු 19 න් පහළ පාසල් ක්‍රිකට් තරග මාලාව අවසන්ව දේශීය තරග පිටියට පිවිසි සිටින, වයස අවුරුද 23 ට නොවැඩි ක්‍රීඩකයින්ගෙන් නැගී එන කණ්ඩායම සැදුම්ලත්ය. ගල්කිස්ස ශාන්ත තෝමස් විදුහලින් ක්‍රිකට් පිටියට පිවිස සිටින නායක ඩෙලෝන් පීරිස් මෙවර නිමාවට පත් වුණු වයස අවුරුදු 23 න් පහළ ක්‍රිකට් තරගාවලියේදී තරගාවලියේ වීරයා ලෙසින් සම්මානය දිනා ගත් ක්‍රීඩකයා වේ. රාගම ක්‍රීඩා සමාජයේ නායකයා ලෙසින් මෙවර තරගාවලිය නියෝජනය කළ ඩෙලෝන් තරග 6 කදී ලකුණු 191 ක් සහ පන්දු යවමින් කඩුලු 29 ක් බිඳ හෙළමින් තේරීම් කමිටුවේ අවධානය දිනා ගත් ක්‍රීඩකයෙකි.

ශ්‍රී ලංකා නැගි එන කණ්ඩායම – ඩෙලෝන් පීරිස් (නායක), සකුණ ලියනගේ, දුනිත් ජයතුංග, සහිල් ඩයස්, ෂෙහාන් ප්‍රනාන්දු, රන්මිත් ජයසේන, සිතාර හපුහින්න, යොහාන් ලියනගේ, හිරන්ත ජයසිංහ, ලක්ෂාන් ගමගේ, තීෂන් විතූෂාන්, ඉමිතියාස් ස්ලාසා, සිතුම් දිසානායක, හර්ෂණ වික්‍රමසිංහ, දනාල් හේමානන්ද.