ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අන්තර් සමාජ පන්දුවාර විස්සයි-20 ක්‍රිකට් තරගාවලියේ අවසන් මහ තරගය හෙට (11 දා) කොළඹ එන්. සී. සී. සහ කෝල්ට්ස් ක්‍රීඩා සමාජ අතර කොළඹ එස්. එස්. සී. ක්‍රීඩාංගණයේදී ආරම්භ වේ. මෙම තරගය පෙ.ව. 10.00 ට ආරම්භ වීමට නියමිතය.
මූලික වටය යටතේ එන්. සී. සී. කණ්ඩායම ‘ඒ’ කාණ්ඩය යටතේද කෝල්ට්ස් කණ්ඩාම ‘බී’ කාණ්ඩය යටතේද තරග වැදි අතර එහිදී එන් සී. සී පිල අපරාජිතව අවසන් කණ්ඩායම් 4 අතර තරග වටයට පිවිසෙද්දී කෝල්ට්ස් කණ්ඩායම සහභාගිවූ තරග 4 න් 3 ක් ජය ගෙන අවසන් පූර්ව තරග වටයට සුදුසුකම් ලැබීය.
ඉකුත් 09 වැනිදා කොළඹ පී. සරා පිටියේ පැවැති අවසන් පූර්ව තරග වලදී ‌එන්. සී. සීි. කණ්ඩායම මුවර්ස් ක්‍රීඩා සමාජය පරදවමින්ද කෝල්ට්ස් කණ්ඩායම ඒස් කැපිටලන් පිල පරදවමින්ද අවසන් මහ තරග වරම උදා කරගත්හ.
අර්ධ අවසන් තරගයේදී ලසිත් ඇඹුල්දෙණිය එන්. සී. සීි. පිල වෙනුවෙන් ක්‍රීඩා කළද දකුණු අප්‍රිකානු ‘ඒ’ කණ්ඩායමේ ශ්‍රී ලංකා තරග සංචාරය සදහා වන සිවුදින තරගාවලියට ඔහුව නම් කර තිබීම නිසා ඔහුට අවසන් මහ තරගයට ක්‍රීඩා කිරීමේ අවස්ථාව මග හැරී තිබේ. ඇඹුල්දෙණිය නොමැති වුවත්, නිරෝෂන් දික්වැල්ල, කමිල් මිශාර, උපුල් තරංග, සහන් ආරච්චිගේ සහ චාමික ගුණසේකර යන ජාතික කණ්ඩායම නියෝජනය කළ සහ වරම් ලද ක්‍රීඩකයින් ක්‍රීඩා කරති.
අනෙක් කණ්ඩායම වන කෝල්ට්ස් කණ්ඩායමද අවසන් කිරුළ වෙනුවෙන් හෙට දිනයේදී සිය උපරිම ශක්තිය යොදනු ඇත. ඇෆ්ගනිස්තානයට එරෙහි එක්දින තරගාවලියේ පළමු තරගය නියෝජනය කළ ඇන්ජලෝ මැතිව්ස් එම තරගාවලියෙන් පසු පැවැති අවසන් පූර්ව තරගයේදී කෝල්ට්ස් පිල නියෝජනය කරමින් අවසන් තරගය සඳහා රැගෙන ඒම වෙනුවෙන් ැපී පෙනෙන මෙහෙයක් සිදු කළේය. ඔහුට අමතව ධනංජය ලක්ෂාන්, දුනිත් වෙල්ලාලගේ, අකිල ධනංජය සහ ජෙහාන් ඩැනියල් හෙට තරගයේදී මුවර්ස් පිලට ශක්තිය දෙන ප්‍රධාන ක්‍රීඩකයෝ වෙති.
මෙම අවසන් මහ තරගය සජීව චැනල් අයි රූපවාහිනී නාලිකාව ඔස්සේ සහ ශ්‍රී ලංකා ක්‍රිකට් ආයතනය යූ ටියුබ් චැනලය ඔස්සේ පෙ.ව. 10.00 සිට සජීවීිව විකාශනය කෙරෙනු ඇත. මෙම තරගය නැරඹීම, ක්‍රීඩා ලෝලීන්ට විවෘතව වන අතර තරගය නැරඹීමට කැමැති ඔ්නෑම අයෙකුට එස්. එස්. සී. ක්‍රීඩාංගණය වෙත පැමිණ නොමිලයේ තරගය නැරඹීමේ අවස්ථාව හිමිවනු ඇත.