ශ්‍රී ලංකා ක්‍රිකට් ආයතනයේ සංවිධානයෙන් පැවැත්වෙන අන්තර් සමාජ ප්‍රධානතම තුන් දින ලීග් ක්‍රිකට් තරගාවලියේ ලකුණු සටහනේ පියවරක් ඉදිරියට පැමිණ ‘ඒ‘ කාණ්ඩයේ පෙරමුණ ගැනීමට කෝල්ට්ස් ක්‍රීඩා සමාජය සමත් වෙයි. පෙර පරිදිම ‘බී‘ කාණ්ඩයේ තවදුරටත් පෙරමුණේ සිටීමට මුවර්ස් ක්‍රීඩා සමාජය සමත්ව සිටී.
‘ඒ‘ කාණ්ඩයේ පෙරමුණේ සිටි රාගම ක්‍රිකට් සමාජය තෙවැනි ස්ථානයට ඇද දමා ‘ඒ‘ කාණ්ඩයේ දෙවැනි තැන සිටි කෝල්ට්ස් පිල පෙරමුණට පැමිණීම ලකුණු සටහනේ විශේෂත්වයකි. කෝල්ට්ස් පිල ලකුණු 36.315ක් ලබා සිටින අතර, දෙවැනි තැනට පැමිණි එස්එස්සී පිල ලකුණු 35. 165ක් ලබා ඇත.
පසුගිය සතියේ නිමාවට පත් වූ කොල්ට්ස් – බීආර්සී අතර තරගයෙන් කෝල්ට්ස් පිල ඉනිමක හා ලකුණු 46ක ජයක් ලබාගත් අතර, එස්එස්සී පිල මීගමුව ක්‍රිකට් සමාජය ඉනිමකින් හා ලකුණු 13කින් පරාජය කිරීමට සමත් විය. මේ හේතුවෙන් ‘ඒ‘ කාණ්ඩයේ ඉදිරියට පැමිණීමට කෝල්ට්ස් හා එස්එස්සී යන කණ්ඩායම් දෙකට හැකියාව ලැබුණි.
‘ඒ‘ කාණ්ඩයේ තෙවැනි තැන සිටින රාගම කණ්ඩායම ලකුණු 29.000ක් ලබා සිටින අතර,සිවුවැනි ස්ථානයේ සිටින මීගමුව ක්‍රිකට් සමාජය ලකුණු 16.325ක්, පස්වැනි ස්ථානයේ සිටින යුද හමුදාව ලකුණු 14.170ක් ලබා සිටිති. සීසීසී ලකුණු 12.625ක්, නුගේගොඩ ක්‍රීඩා හා සුබ සාධන සමාජය ලකුණු 8.470ක්, පානදුර ක්‍රීඩා සමාජය ලකුණු 7.115ක්, බීආර්සී පිල ලකුණු 6. 960ක් කැන්ඩි කස්ටම්ස් ක්‍රීඩා සමාජය ලකුණු 5.115ක් හා ගාල්ල ක්‍රිකට් සමාජය ලකුණු 3.800ක් ලබා සිටිති.
‘බී‘ කාණ්ඩයේ දෙවැනි ස්ථානයේ හලාවත මේරියන්ස් ලකුණු 31.245ක් ලබා සිටින අතර, තෙවැනි ස්ථානයේ ඒස් කැපිටල් ක්‍රිකට් සමාජය ලකුණු 24.770ක් ලබා සිටී. ‘බී‘ කාණ්ඩයේ පිළිවෙලින් එන්සීසී ලකුණු 23.265ක්, බදුරලිය ක්‍රිකට් සමාජය ලකුණු 20.465ක්, පොලිස් ක්‍රීඩා සමාජය ලකුණු 12.425ක්, ටැමිල් යූනියන් පිල ලකුණු 11.110ක්, ගුවන් හමුදාව ලකුණු 7.385ක්, සෙබස්තියනයිට්ස් ලකුණු 7.355ක්, බ්ලුම්ෆීල්ඩ් ලකුණු 6.910ක් හා කුරුණෑගල තරුණ ක්‍රිකට් ක්‍රීඩා සමාජ ලකුණු 5.870ක් ලබා සිටිති.
ශ්‍රී ලංකා ක්‍රිකට් සංවිධානය කරන එල්පීඑල් ක්‍රිකට් තරගාවලිය හේතුවෙන් මෙම තරගාවලිය අදියර දෙකක් යටතේ සංවිධානය කොට ඇත. ඒ අනුව මේජර් ලීග් අන්තර් සමාජ තුන්දින ක්‍රිකට් තරගාවලියේ පළමු අදියර ජූලි මස 23 දක්වා හා දෙවැනි අදියර අගෝස්තු මස 25 සිට ඔක්තෝබර් 8 දක්වා පැවැත්වේ. ‘ඒ‘ හා ‘බී‘ වශයෙන් පළමු පෙළ ක්‍රීඩා සමාජ 22ක් එක්ව සිටින මෙම තරගාවලිය අවසන් මහා තරගය ද ඇතුලුව තරග 82කි.
මේජර් ලීග් අන්තර් සමාජ තුන්දින ක්‍රිකට් තරගාවලියේ මේ 7 වැනිදා සිට 9 වැනිදා දක්වා පැවැත්වෙන තරග මෙසේය.
- සීසීසී – ගාලු ක්‍රිකට් සමාජය අතර තරගය සීසීසී පිටියේදී
- නුගේගොඩ ක්‍රීඩා හා සුබ සාධන සමාජය – කැන්ඩි කස්ටම් අතර තරගය මොරටුව ද සොයිසා පිටියේදී
- යුද හමුදාව – බීආර්සී පනාගොඩ යුද හමුදා පිටියේදී
එස්එස්සී – රාගම අතර තරගය එස්එස්සී පිටියේදී - කොල්ට්ස් – පානදුර අතර තරගය කෝල්ට්ස් පිටියේදී
- ටැමිල් යූනියන් – පොලිස් කුරුණෑගල අතර තරගය පොලිස් පිටියේදී
- කුරුණෑගල තරුණ – ගුවන් හමුදාව අතර තරගය වෙලගෙදර පිටියේදී
- මුවර්ස් – බ්ලුම්ෆීල්ඩ් අතර තරගය මුවර්ස් පිටියේදී
- එන්සීසී – ඒස් කැපිටල් අතර තරගය කටුනායකදී
- හලාවත මේරියන්ස් – බදුරලිය අතර තරගය මග්ගොන සරේ පිටියේදී
