නවසීලන්ත ටෙස්ට් කණ්ඩායම සමඟින් මේ මස 18 වැනිදා ගාල්ල අන්තර්ජාතික ක්‍රීඩාංගණයේ ආරම්භ වීමට නියමිත තරග 2 කින් සමන්විත ටෙස්ට් තරගාවලිය සඳහා වන ශ්‍රී ලංකා කණ්ඩායම ප්‍රකාශයට පත් කර තිබෙන අතර එහිදී දකුණු අප්‍රිකානු ‘ඒ‘පිලට එරෙහි පළමු සිව්දින තරගයේදී දක්ෂතා දක්වන ලද  ශ්‍රී ලංකා ‘ඒ‘ කණ්ඩායමේ ඕෂධ ප්‍රනාන්දුව යළි කණ්ඩායමට එක් කිරීමට ශ්‍රී ලංකා ක්‍රිකට් තේරීම් කමිටුව පියවර ගෙන තිබේ.

කෙසේ වෙතත් නම් කර ඇති 16 දෙනෙකුගෙන් සමන්විත ශ්‍රී ලංකා කණ්ඩායමට එංගලන්ත තරග සංචාරයට සහභාගිවූ කඩුලු රකින ආරම්භක පිතිකරු නිශාන් මදුෂ්කගේ නම ඇතුළත්නොවීම කැපී පෙනෙයි. පසුගිය වසර එකහමාරක කාලය තුළදී ශ්‍රී ලංකා පිලේ ආරම්භක පිතිකරුවා ලෙසින් කටයුතු කළ නිශාන් මදුෂ්ක එංගලන්ත තරග සංචාරයේදී පිතිකරුවකු ලෙස අසාර්ථකත්වයට පත්විය. එම තරගාවලිය යටතේ පැවැති පළමු ටෙස්ට් තරග 2 ටම මදුෂ්ක ක්‍රීඩා කළද ඔහුට එහිදී රැස් කර ගත හැකි වූයේ 7, 13, 4 සහ 0 වශයෙනි.

දේශීය තරගාවලියේදී දක්ෂතා අතරට සිටි ඔෂද ඉකුත්දා දකුණු අප්‍රිකාවේදී නිමාවට පත් වුණු පළමු සිව්දින තරගයේදී ශ්‍රී ලංකා ඒ පිල වෙනුවෙන් පළමු ඉනිමේදී ලකුණු 122 ක් සහ දෙවැනි ඉනිමේදී ලකුණු 80 ක් ලබා ගනිමින් තම කණ්ඩායම ජයග්‍රහණය කරා රැගෙන ඒමට විශාල දායකත්වයක් දැක්වීය. එම දක්ෂතා මත පදනම්ව එදා මෙදා ඉතිහාසය තුළ දකුණු අප්‍රිකාවේදී වාර්තා කරන ලද පළමු සිව්දින තරග ජය වාර්තා කිරීමට ශ්‍රී ලංකා ‘ඒ‘ කණ්ඩායමට හැකියාව ලැබිණ.

දකුණතින් පිත්ත හසුරුවන ඔෂධ ශ්‍රී ලංකාව වෙනුවෙන් ටෙස්ට් තරග 21 කදී ලකුණු 1091 ක් ලබා සිටින්නේ ඉනිමක ලකුණු ලබා ගැනීමේ සාමාන්‍ය 33.06 ක් රදවා ගනිමිනි. ඔහු අවසන් වතාවට ටෙස්ට් තරගයකට ක්‍රීඩා කරන ලද්දේ 2023 වසරේ මාර්තු මස නවසීලන්ත පිලට එරෙහිව වෙලිංටන්හිිදී පැවැත් ටෙස්ට් තරගය වේ.

මීට අමතරව වේග පන්දු යවන්නන්ට එංගලන්තයේ දක්වනු ලබන වාසිය ප්‍රධාන කොට කණ්ඩායම සමග ගිය නිසල තාරකටද මෙම තරගාවලියේදී ස්ථානය අහිමිව තිබේ.

ශ්‍රී ලංකා කණ්ඩායම – ධනංජය ද සිල්වා (නායක), දිමුත් කරුණාරත්න, පැතුම් නිස්සංක, කුසල් මෙන්ඩිස්, ඇන්ජලෝ මැතිව්ස්, දිනේෂ් චන්දිමාල්, කමිදු මෙන්ඩිස්, සදීර සමරවික්‍රම, ඔෂද ප්‍රනාන්දු, අසිත ප්‍රනාන්දු, විශ්ව ප්‍රනාන්දු, ළහිරු කුමාර, ප්‍රභාත් ජයසූරිය, රමේෂ් මෙන්ඩිස්, ජෙෆ්රි වැන්ඩර්සි, මිලාන් රත්නායක.