කුසලතා පිරි තරුණ ක්‍රිකට් ක්‍රීඩකයින්ගේ දක්ෂතා ගවේෂණය කරගැනීමේ අරමුණින් ශ්‍රී ලංකා ක්‍රිකට් ආයතනය සංවිධානය කරනු ලබන වයස අවු 15න් පහළ ප්‍රීමා ශ්‍රී ලංකා යූත් ලීග් ක්‍රිකට් තරගාවලියේ පිට පිට දෙවැනි ජය වාර්තා කිරීමට ‍කොළඹ දකුණ ක්‍රීඩකයෝ අද සමත් වූහ. කොළඹ විශ්වවිද්‍යාල ක්‍රීඩාංගණයේ පැවති තරගයේදී දඹුල්ල පිල ලකුණු 76කින් පරාජය කළ කොළඹ දකුණ පිල මේ සමඟ අපරාජිතව ඉදිරියට පැමිණියේය.

කාසියේ වාසිය දිනාගත් දඹුල්ල පිලේ ආරාධනාවෙන් මුලින් පන්දුවට පහරදුන් කොළඹ දකුණ පිල සියලු දෙනා දැවී ලකුණු 151ක් ලබාගත් අතර, පිළිතුරු ඉනිම හඹාගිය දඹුල්ල පිල ලකුණු 75කට සීමා වූවේය. ජයග්‍රාහී කොළඹ දකුණ පිලේ ආරම්භක පිතිකරු දු‍ෂේන් උඩුවල හා අංක තුන පිතිකරු රෙෂාන් සොලමන්ස් දෙවැනි කඩුල්ලට පන්දු 137කදී ලකුණු 89ක සබඳතාවක් ගොඩනැගී‍මෙන් කොළඹ දකුණ පිලට ස්ථාවරත්වයක් ‍ගොඩනැගුණු අතර, දඹුල්ල පිලේ යුමාල් එගොඩගේ ලකුණු 24කට කඩුලු 5ක් බිඳ හෙලීම කැපී පෙණුනි.

දඹුල්ල පිලේ පළමු කඩුලු 3 ලකුණු 9කට දවා ගැනීමට කොළඹ දකුණ පිල සමත් වූ අතර, එයින් කඩුලු 2ක් චමිත කංකානම්ගේ බිදහෙලීය. දඹුලු මුල් පිතිකරුවන් 5ක්ම ලකුණු 5කට අඩුවෙන් දවා ගැනීමෙන් පීඩනය වැඩි විය.

තරගාවලියේ තෙවැනි දිනයේ තරග අනිද්දා (24) මහනුවර – කොළඹ දකුණ අතර කොළඹ විශ්වවිද්‍යාල ක්‍රීඩාංගණයේදී හා දඹුල්ල – ගාල්ල අතර තර්ස්ටන් ක්‍රීඩාංගණයේදී පැවැත්වීමට නියමිතය.

කොළඹ දකුණ පිල සියලු දෙනා දැවී ලකුණු 151 (ඕවර 46.4)
දු‍ෂේන් උඩුවල 43, රෙෂාන් සොලමන් 44, අධීෂ ලක්ෂාන් 10, චමිත කංකානම්ගේ 17, අති‍රේක 11 (චමෝද් ප්‍රභාෂ 10/1, මහේෂ ඉඳුරංග 18/3, යුමාල් එගොඩගේ 24/5 )

දඹුල්ල පිල සියලු දෙනා දැවී ලකුණු 75 (ඕවර් 36.3)
ටෙරාන් සචින් 19, අමල් පෙරේරා 15, අතිරේක 6 (චමිත කංකානම්ගේ 13/2, අදීෂ ලක්ෂාන් 8/1, මෙතුම් ප්‍රනාන්දු 17/2, තාරුක සමින්ජිත 13/2, මෙතුක ගුණරත්න 8/1)