නොවැම්බර් මස 09වැනිදා නවසීලන්ත පිලට එරෙහිව ආරම්භ වන තරග 2 කින් සමන්විත පන්දුවාර විස්සයි-20 ක්‍රිකට් තරගාවලිය සඳහා නම් කරන ලද ශ්‍රී ලංකා කණ්ඩායමට, බටහිර ඉන්දීය කොදෙව් කණ්ඩායමට එරෙහිව පැවැති තරගාවලියේදී නම් කරන ලද ක්‍රීඩකයින් 17 දෙනාම නම් කිරීම කැපී පෙනෙයි. කෙසේ වෙතත් නොවැම්බර් මස 13 වැනිදා සිට ආරම්භ වන දෙරට අතර එක්දින තරගාවලිය සඳහා නම් කරන ලද ශ්‍රී ලංකා එක්දින කණ්ඩායමට කුසල් ජනිත් පෙරේරාව කැඳවීමට තේරීම් කමිටුව පියවර ගෙන තිබේ.

ඒ අනුව කුසල් පෙරේරා එක්දින කණ්ඩායමට පැමිණෙන්නේ හරියකට වසරකට පසුව වීම කැපී පෙනෙයි. අවසන් වතාවට ඔහු එක්දින තරගයකට ක්‍රීඩා කර ඇත්තේ 2023 වසරේ නොවැම්බර් 09 වැනිදා නවසීලන්ත පිලට එරෙහිව බෙංගලාරුහි පැවැති එක්දින තරගය වේ.

නොවැම්බර් මස 9 සහ 10 වැනිදා යන දෙදිනෙන් අනතුරුව නොවැම්බර් 13 වැනිදා පළමු එක්දින තරගය පැවැත්වෙන අතර අනතුරුව 14 වැනිදා පැවැත්වෙන මහ මැතිවරණයෙන් අනතුරුව පැවැත්වෙන තරග 2 පල්ලේකැලේ ජාත්‍යන්තර ක්‍රීඩාංගණයේදී 17 සහ 19 යන දෙදිනදී පැවැත්වෙනු ඇත.

‍

මෙම තරගාවලියට සහභාගිවීම සඳහා මිචෙල් සැන්ට්නර්ගේ නායකත්වයෙන් යුතු නවසීලන්ත කණ්ඩායම ඊයේ (05 දා) සහ අද (06) දා කාණ්ඩ දෙකක් වශයෙන් ශ්‍රී ලංකාවට පැමිණියහ.

ශ්‍රී ලංකා විස්සයි-20 කණ්ඩායම – චරිත් අසලංක (නායක), පැතුම් නිස්සංක, කුසල් මෙන්ඩිස්, කුසල් පෙරේරා, කමිඳු මෙන්ඩිස්, වනිඳු හසරංග, චමිදු වික්‍රමසිංහ, මහීෂ් තීක්ෂණ, මතීෂ පතිරණ, නුවන් තුෂාර, බිනුර ප්‍රනාන්දු, අසිත ප්‍රනාන්දු, දුනිත් වෙල්ලාලගේ, දිනේෂ් චන්දිමාල්, අවිශ්ක ප්‍රනාන්දු, භානුක රාජපක්ෂ, ජෙෆ්රි වැන්ඩර්සි.

ශ්‍රී ලංකා එක්දින කණ්ඩායම – චරිත් අසලංක (නායක), පැතුම් නිස්සංක, කුසල් මෙන්ඩිස්, කුසල් පෙරේරා, කමිදු මෙන්ඩිස්, වනිඳු හසරංග, ජනිත් ලියනගේ, අවිශ්ක ප්‍රනාන්දු, සදීර සමරවික්‍රම, නිශාන් මදුෂ්ක, දුනිත් වෙල්ලාලගේ, ජෙෆ්රි වැන්ඩර්සි, චමිදු වික්‍රමසිංහ, අසිත ප්‍රනාන්දු, මොහොමඩ් ශිරාස්, ඩිල්ෂාන් මදුෂංක, මහීෂ් තීක්ෂණ.

අතිරේක – එෂාන් මාලිංග, ළහිරු උදාර, නුවනිඳු ප්‍රනාන්දු, සහන් ආරච්චිගේ, පවන් රත්නායකගේ.