සංචාරක නවසීලන්ත කණ්ඩායම හා ශ්‍රී ලංකාව අතර රංගිරි දඹුලු ජාත්‍යන්තර ක්‍රිකට් ක්‍රීඩාංගණයේ නොවැම්ඊබර්යේ 10 වැනිදා දෙවැනි විස්සයි20 තරගයෙන් නවසීලන්තය ලකුණු 5ක තියුණු ජයක් හිමිකර ගැනීමත් සමඟ තරග දෙකකින් සමන්විත විස්සයි20 තරගාවලිය 1-1ක් ලෙස සම මට්ටමින් අවසන් විය.

තරගයේ කාසියේ වාසිය ජයග්‍රහණය කළ ශ්‍රී ලංකා නායක චරිත් අසලංක විසින් නවසීලන්තයට පළමුව පන්දුවට පහර දීමට ආරාධනා කළ හෙයින් නවසීලන්ත පිල ඕවර් 19.3කදී ලකුණු 108ක් ලබාගත් අතර, ශ්‍රී ලංකා පිලේ සියලු දෙනා ලකුණු 103කට දැවී ගියහ.

නවසීලන්තයෙන් ශ්‍රී ලංකාවට එල්ල වූ ඉලක්කය බැලූ බැල්මට පහසු බව පෙනුණද රාත්‍රී කාලයේ දඟ පන්දුවෙන් මතුවූ අභියෝග පරාජයට බලපෑම් කළේය . ශ්‍රී ලංකා ඉනිමේ පළමු කඩුල්ල ලෙස කුසල් මෙන්ඩිස් ඉනිමේ ලකුණු පුවරුව 6ක් වන විට දැවී ගිය අතර, එතැන් පටන් ශ්‍රී ලංකා පිතිකරුවන් එකා පසු පස එකා තම කඩුලු නවසීලන්තය වෙත පූජා කළහ.

ආරම්භක පිතිකරු පැතුම් නිස්සංක ඉතා ඉවසිලිවන්ත ලෙස සිය ඉනිම දියත් කරමින් පන්දු 51කදී හතරේ 6ක් සමඟ ලකුණු 52ක් වාර්තා කළ අතර, එය ඔහුගේ විස්සයි20 ක්‍රිකට් දිවියේ 13 වැනි අර්ධ ශතකය වූවේය. පැතුම්ගේ ඉනිම සියලු පිතිකරුවන්ට ආදර්ශයක් ගෙන දුන් එකක් වුවද එහි ප්‍රඵලය ශ්‍රී ලංකාවට අත් නොවුණි.

ශ්‍රී ලංකා ඉනිමට දායකත්වයක් දුන් මහීෂ් තීක්ෂණ ලකුණු 14ක් ලබාගත් අතර, භානුක රාජපක්ෂ ලකුණු 15ක් ලැබීය. වගකීමෙන් යුතු පන්දු යැවීමක නිරත වූ ෆර්ගියුසන් ලකුණු 7කට කඩුලු 3ක්, ම‍චෙල් බෘස්වෙල් ලකුණු 23කට කඩුලු 2ක් හා ග්‍ලේන් පිලිප්ස් ලකුණු 6කට කඩුලු 2ක් බිඳහෙලා ශ්‍රී ලංකා පිතිකරුවෝ අපහසුතාවට පත් කළහ.

නවසීලන්ත පළමු කඩුල්ල ඉනිමේ පළමු පන්දුවෙන් ම දවා ගැනීමට නුවන් තුෂාර සමත්වමෙන් ශ්‍රී ලංකා බලපොරොත්තු ඉහළ ගිය අතර, අනතුරුව නවසීලන්තයට පහසුවෙන් ලකුණු ලබා ගැනීමට කිසිදු ඉඩක් නොවුණි. නවසීලන්ත ආරම්භක පිතිකරු ටිම් රොබින්සන් ක්‍රීඩාගාරයට යෑමෙන් පසු යළි ක්‍රියාත්මකවූ තුෂාර ඊළඟ ඕවයේදී මාර්ක් චැප්මන්ට එවූ පන්දුවකට කමිඳු මෙන්ඩිස් උඩ පන්දුවක් රැක ගැනීමෙන් දැවී ගිය අතර, එවිට ලකුණු පුවරුව 6ක් විය. අසරණ වූ නවසීලන්ත මුල් කඩුලු 5 ලකුණු 45ක් තුළ දවා ගැනීමට ශ්‍රී ලංකා පන්දු යවන්නෝ සමත් වූ අතර, ආරම්භක පිතිකරු විල් යංග් පන්දු 32කදී ලකුණු 30ක් හා ජෝජ් ක්ලාක්සන් පන්දු 25කදී ලකුණු 24ක් ලබා යම් සහනයක් ගෙන දුන්හ.

වනිඳු හසරංග ලකුණු 17කට කඩුලු 4ක් බිඳ හෙලූ අතර, මතීෂ පතිරණ ලකුණු 11කට කඩුලු 3ක්, නුවන් තුෂාර ලකුණු 22කට කඩුලු 2ක් හා මහීෂ් තීක්ෂණ ලකුණු 16කට කඩුල්ලක් දවා ගැනීමට සමත් වූහ.

තරගයේ වීරයා සම්මානය ලොකී ෆර්ගියුසන්ට හා තරගාවලියේ වීරයා සම්මානය වනිඳු හසරංග දිනා ගත්හ.

දෙරට අතර පැවැත්වීමට නියමිත තරග තුනකින් යුත් එක්දින තරගාවලිය මේ 13 වැනිදා රංගිරි දඹුලු ජාත්‍යන්තර ක්‍රිකට් ක්‍රීඩාංගණයේ ආරම්භ වේ.

නවසීලන්ත පන්දුවාර 19.3 කදී සියලු දෙනා දැවී ලකුණු 108 යි

විල් යංග් 30, මිචෙල් සැන්ට්නර් 19, ජොෂ් ක්ලාක්සන් 24 වනිඳු හසරංග 17/4, මතීෂ පතිරණ 11/3, නුවන් තුසාර 22/2, මහීෂ් තීක්ෂණ 16/1

ශ්‍රී ලංකාව පන්දුවාර 19.5 කදී සියලු දෙනා දැවී ලකුණු 103 යි

පැතුම් නිස්සංක 52, භානුක රාජපක්ෂ 15, මහීෂ් තීක්ෂණ 14, ලොකී ෆර්ගුයිසන් 07/3, ග්ලෙන් පිලිප්ස් 06/3, මයිකල් බ්‍රේස්වෙල් 23/2, මිචෙල් සැන්ට්නර් 14/1, සැකරි ෆෝල්ක්ස් 23/1