මැලේසියාවේ ක්වාලාලාම්පුරහි දි අද ආරම්භවූ වයස අවුරුදු 19න් පහළ ආසියානු කුසලාන කාන්තා විස්සයි20 ක්‍රිකට් තරගාවලියේ පළමු තරගයෙන් ශ්‍රී ලංකා පිල ලකුණු 94ක ජයක් හිමිකර ගත්තේය.

මැලේසියානු කාන්තා කණ්ඩායම පරාජය කරමින් සාර්ථක ආරම්භයක් ලබාගත් ශ්‍රී ලංකා යොවුන් ක්‍රීඩිකාවෝ කාසියේ වාසිය දිනා පළමුව පන්දුවට පහරදී කඩුලු 4ක් දැවී ලකුණු 153ක් ලබා ගත්හ.

ලිමන්සා තිලකරත්න සහ නායිකා මනුදී නානායක්කාර පස්වැනි කඩුල්ලට නොබිඳුණු ලකුණු 109ක සබඳතාවක් ගොඩනැගීමට සමත්වීමෙන් ලකුණු පුවරුව ශක්තිමත් වූ අතර, ලිමන්සා පන්දු 46කදී හත‍ේ පහර 4ක් සමඟ නොදැවී ලකුණු 41ක් රැස්කළ අතර, මනුදී පන්දු 40කදී හතරේ පහර 16ක් සමඟ නොදැවී ලකුණු 74ක් රැස් කළාය.

පිළිතුරු ඉනිම ක්‍රීඩාකළ මැලේසියානු යොවුන් ක්‍රීඩිකාවෝ ඕවර් 20 අවසානයේදී කඩුලු 6ක් දැවී ලකුණු 59කට සීමා විය. දකුණත් පිට දඟ පන්දු යවන රත්ගම දේවපතිරාජ විදුහලෙන් බිහිවූ හිරුණි හංසිකා ලකුණු 2කට කඩුලු 2ක් දවා ගැනීමට සමත් වූවාය.

හෙට (16) දිනයේ ශ්‍රී ලංකා යොවුන් පිල හා බංග්ලාදේශ යොවුන් පිල අතර තරගය ශ්‍රී ලංකා වේලාවෙන් පෙරවරු 7ට ආරම්භ වීමට නියමිතය.

ශ්‍රී ලංකා යොවුන් පිල කඩුලු 4ක් දැවී ලකුණු 153 (ඕවර් 20)
ලිමන්සා තිලකරත්න නොදැවී 41, මනුදී නානායක්කාර නොදැවී 74, දහමි සෙනිත්මා 11, අතිරේක 15 (නූර් දානියා 21/2)

මැලේසියානු කඩුලු 6ක් දැවී ලකුණු 59 (ඕවර් 20)
නූර් අයින් 12, සුබිකා මනිවන්නන් 11, අතිරේක 15 ( හිරුණි හංසිකා 2/2, රශ්මිකා සෙව්වන්දි 3/1, ‍ප්‍රමුදි මෙත්සරා 7/1, චමෝදි ප්‍රබෝධා 13/1, අසේනි තලගුනේ 6/1)