ඔස්ට්‍රේලියානු ක්‍රිකට් කණ්ඩායමේ ශ්‍රී ලංකා සංචාරය යටතේ කළින් ප්‍රකාශයට පත් කළ පරිදි එක්දින තරගයක් වෙනුවට එක්දින තරග දෙකක් පැවැත්වීමට නියමිත බව ශ්‍රී ලංකා ක්‍රිකට් නිවේදනය කර සිටියි. ක්‍රිකට් ඔස්ට්‍රේලියාව සමඟ සාකච්ඡා කිරීමෙන්  පසු ශ්‍රී ලංකා ක්‍රිකට් ඉහත තීරණය ගෙන තිබේ.

ඒ අනුව දෙරට අතර පැවැත්වෙන තරගාවලිය ටෙස්ට් තරග 2කින් සහ එක්දින තරග 2 කින් යුක්ත වනු ඇත.

මෙම තරගාවලියට සහභාගිවීම සඳහා වන ඔස්ට්‍රේලියානු කණ්ඩායම ජනවාරි මස 24 වැනිදා ශ්‍රී ලංකාවට පැමිණීමට නියමිතය.

දෙරට අතර පැවැත්වෙන තරග 2 කින් සමන්විත ටෙස්ට් තරගාවලියේ පළමු තරගය ජනවාරි මස 29 වැනිදා සිට පෙබරවාරි 02 වැනිදා දක්වා ද දෙවැනි තරගය පෙබරවාරි 06 වැනිදා සිට 10 වැනිදා දක්වා ගාල්ල ජාත්‍යන්තර ක්‍රීඩාංගණයේදී පැවැත්වෙනු ඇත.

තරග 2 කින් සමන්විත එක්දින තරගාවලිය පෙබරවාරි මස 12 සහ 14 යන දෙදින කොළඹ ආර්. ප්‍රේමදාස ක්‍රීඩාංගණයේදී දිවා තරග ලෙසින් පැවැත්වෙනු ඇත.