මැලේසියාවේ පැවැත්වෙන වයස අවුරුදු 19 න් පහළ බාළිකා ලෝක කුසලාන ක්‍රිකට් තරගාවලියේ විනිසුරු කටයුතු වෙනුවෙන් පත් කරන ලද නිලධාරීන් 20 දෙනා අතරට ශ්‍රී ලංකා කාන්තා ක්‍රිකට් කණ්ඩායමේ හිටපු සාමාජිකාවක වන, වර්තමාන ක්‍රිකට් විනිසුරුවරියක ලෙසින් කටයුතු කරන දේදුණු ද සිල්වා තේරී පත්ව සිටියි.
ශ්‍රී ලංකාව වෙනුවෙන් එක්දින තරග 42 කට සහ පන්දුවාර විස්සයි-20 තරග 6 කට ක්‍රීඩා කර ඇති දේදුණු ද සිල්වා වැඩි කාලයක් ශ්‍රී ලංකා කාන්තා ක්‍රිකට් කණ්ඩායමේ ආරම්භක පිතිකාරිණියක ලෙසින් කටයුතු කළාය. ක්‍රිකට් ක්‍රීඩාවෙන් විශ්‍රාම ගැනීමෙන් පසු ඇය විනිසුරුකරණය තෝරා ගත්තාය. මෙවර බාළිකා ලෝක කුසලාන ක්‍රිකට් තරගාවලිය දේදුණුගේ පළමු බාළිකා ලෝක කුසලාන තරගාවලිය නොවන අතර ඇය මීට පෙර පළමු වතාවට පැවැති බාළිකා ලෝක කුසලාන ක්‍රිකට් තරගාවලියේදීද විනිසුරුවරියක ලෙසින් කටයුතු කළාය. එම තරගාවලියේදී පැවැති අවසන් මහ තරගය වූ ඉන්දියාව සහ එංගලන්තය අතර තරගයේ රූපවාහිනී විනිසුරුවරිය ලෙසින්ද කටයුතු කරන ලද්දේ දේදුණු ද සිල්වා වීම කැපී පෙනෙයි.
