ශ්‍රී ලංකා ක්‍රිකට් ආයතනය සංවිධානය කරනු ලබන අන්තර් සමාජ පළමු පෙළ විස්සයි-20 ක්‍රිකට් තරගාවලිය මැයි මස 16 වැනිදා (හෙට) සිට ජුනි මස 09 වැනිදා දක්වා කෝල්ට්ස්, පී. සරා, සී. සී. සී., එස්. එස්. සී. සහ එන්. සී. සී. යන ක්‍රීඩාංගණවලදී පැවැත්වේ.

කණ්ඩායම් 14 ක් ‘ඒ‘ සහ ‘බී‘ වශයෙන් ප්‍රධාන කාණ්ඩ දෙකකට බෙදී ලීග් ක්‍රමයට අනුව මූලික වටයේ තරග වදිනු ලබන අතර එය අවසානයේ එක් එක් කාණ්ඩවල පෙරමුණ ගනු ලබන කණ්ඩායම් 4 අතර අර්ධ අවසන් පූර්ව තරග වටයට සුදුසුකම් ලබනු ඇත. එතැන් පටන් තරගාවලිය පිළිමළුන් පිටුදැකීමේ ක්‍රමයට අනුව පැවැත්වෙන අතර අර්ධ අවසන් පූර්ව තරග ජුනි මස 05 වැනිදාද අවසන් පූර්ව තරග ජුනි මස 07 වැනිදාද පැවැත්වෙනු ඇත. තරගාවලියේ අවසන් මහ තරගය ජුනි මස 09 වැනිදා පැවැත්වෙනු ඇති අතර එම තරගයට වර්ෂාවෙන් බාධා ඇති වුවහොත් අතිරේක දිනයක්ද වෙන් කර තිබීම කැපී පෙනෙයි.

ගිය වසරේ පැවැති තරගාවලියේ ශූරතාව දිනා ගැනීමට එන්.සී.සී. කණ්ඩායම සමත්වූ අතර ඔවුන් විසින් අවසන් මහ තරගයේදී බ්ලූම්ෆීල්ඩ් ක්‍රීඩා සමාජයට එරෙහිව කඩුලු 8 ක ජයක් වාර්තා කරමින් එම ශූරතා කුසලානය දිනාගැනීමට සමත්විය.

‘ඒ‘ කාණ්ඩය – එන්.සී.සී., මුවර්ස්, සී.සී.සී., ඒස් කැපිටල්, පානදුර, බදුරලිය, කුරුණෑගල තරුණ.

‘බී‘ කාණ්ඩය – බ්ලූම්ෆීල්ඩ්, බී.ආර්.සී., කෝල්ට්ස්, ටැමිල් යුනියන්, පොලිස්, හලාවත මේරියන්ස්, නුගේගොඩ.