ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අන්තර් සමාජ ටියර් ‘බී‘ කොටසේ ක්‍රිකට් තරගාවලියේ මූලික වටය අවසන් වීමත් සමග අර්ධ අවසන් පූර්ව තරග වරම් දිනා ගැනීමට එස්.එස්.සී, යුනයිටඩ් සදර්න්, රාගම, නාවික හමුදා, මැලේ, ලියෝ, යුද හමුදා සහ ගාල්ල ක්‍රීඩා සමාජ සමත්ව සිටිති.

කණ්ඩායම් 12ක් කාණ්ඩ දෙකක් යටතේ තරග වැදි මූලික වටයේ තරග ජූනි 02 වැනිදා අවසන් වූ අතර එහිදී අදාළ කාණ්ඩවල ඉදිරියෙන් පසුවෙන කණ්ඩායම් 4 පිළිමළුන් පිටුදැකීමේ හෙවත් අර්ධ අවසන් පූර්ව තරග වටයට සුදුසුකම් ලබාගත්හ.

මෙහිදී ‘ඒ‘ කාණ්ඩයෙන් තරග වැදි එස්.එස්.සී. කණ්ඩායම තරග 5 කදී ජයග්‍රහණය 4 ක් සමඟින් අපරාජිතව එම කාණ්ඩයේ පෙරමුණ ගනිමින් මෙම තරග වටයට සුදුසුකම් ලබද්දී ‘බී‘ කාණ්ඩයේ රාගම ක්‍රීඩා සමාජය තරග 5 කදී ජයග්‍රහණ 4 ක් සමඟින් පෙරමුණට පත්විය.

ඒ අනුව හෙට (ජුනි 04) කොළඹ කෝල්ට්ස් සහ මග්ගොන සරේ ක්‍රීඩාංගවලදී පැවැත්වෙනු ඇත .මෙහිදී ප්‍රබල එස්.එස්.සී. ක්‍රීඩා සමාජ යුනයිටඩ් සදර්න් ක්‍රීඩා සමාජය සමග පෙරවරුවේදී කෝල්ට්ස් පිටියේදී තරග වදිද්දී එදින පස්වරුවේදී රාගම සහ නාවික හමුදා කණ්ඩායමට තරග වදිනු ඇත.

සරේ ක්‍රීඩාංගණයේදී පැවැත්වීමට නියමිත තරග වලදී පෙරවරුවේ මැලේ ක්‍රීඩා සමාජය සහ ලියෝ ක්‍රීඩා සමාජය ද පස්වරුවේදී යුද හමුදා ක්‍රීඩා සමාජය සහ ගාල්ල ක්‍රීඩා සමාජයද තරග වදිනු ඇත.

අර්ධ අවසන් පූර්ව තරග

කෝල්ට්ස් පිටියේදී

පළමු අර්ධ අවසන් පූර්ව තරගය – එස්. එස්. සී. සහ යුනයිටඩ් සදර්න් ක්‍රීඩා සමාජ අතර

දෙවැනි අර්ධ අවසන් පූර්ව තරගය – රාගම සහ නාවික හමුදා ක්‍රීඩා සමාජ අතර

මග්ගොන සරේ පිටියේදී

තෙවැනි අර්ධ අවසන් පූර්ව තරගය – මැලේ සය ලියෝ ක්‍රීඩා සමාජ අතර

සිව්වැනි අර්ධ අවසන් පූර්ව තරගය – යුද හමුදාව සහ ගාල්ල ක්‍රීඩා සමාජ අතර