බටහිර ඉන්දීය කොදෙව් දූපත්හි තරග සංචාරයක නිරතව සිටින ශ්‍රී ලංකා අවුරුදු 19 න් පහළ කණ්ඩායම සහ බටහිර ඉන්දීය කොදෙව් දූපත් යොවුන් කණ්ඩායම අතර පැවැති සිව්වැනි නිල නොවන එක්දින ක්‍රිකට් තරගයෙන් ඩක්වර්ත් සහ ලුවිස් න්‍යාය අනුව කඩුලු 2 ක ජයක් වාර්තා කිරීමට බටහිර ඉන්දීය කොදෙව් යොවුන් කණ්ඩායම සමත්විය. මේ අනුව තරග 7 කින් සමන්විත දෙරට අතර තරගාවලිය දෙපිළම 2-2 ක් ලෙස සමව පසු වෙති.

කූලිජ් ක්‍රිකට් ක්‍රීඩාංගණයේ පැවැති මෙම තරගයේදී පළමුව පන්දුවට පහර දුන් ශ්‍රී ලංකා යොවුන් කණ්ඩායම පන්දුවාර 39.3 කදී සියලු දෙනා ලකුණු 182 කට දැවී ගිය අතර එම ඉලක්කය හඹා යෑමේදී තරගයට වර්ෂාවෙන් බාධා ඇතිවීම නිසා ඔවුන්ට පන්දුවාර 35 කදී ලකුණු 166 ක ඉලක්කයක් හිමිවිය. කෙසේ අවසන් පන්දු 6 දී කොදෙව් කණ්ඩායමට ජයග්‍රහණය සඳහා ලකුණු 10 ක් ලබා ගත යුතු වූ අතර එම පන්දු වාරය යැවූ සෙත්මික සෙනෙවිරත්නට එරෙහිව පළමු පන්දුවට හයේ පහරක් සහ සිව්වැනි පන්දුවට හතරේ  පහරක් එල්ල කළ ශකුඒන් බෙලේ කොදෙව් කණ්ඩායම කඩුලු 2 ක ජයග්‍රහණයක් කරා රැගෙන ගියේය.

ඉලක්කය කුඩා වුවද සටන අත් නොහළ ශ්‍රී ලංකා යොවුන් පන්දු යවන්වෝ මුලු ලකුණු සංඛ්‍යාව 22 ක්ව තිබියදී ඉදිරිපෙළ පිතිකරුවන් සිව් දෙනාම තරග නරඹන්නන් බවට පත් කිරීමට සමත්වූහ. ඒ අතර අංක 3 පිතිකරු එර්ෂිනෝ ෆොන්ටේන්ව කඩුලු අතර දිව යෑමේදී රමිරු පෙරේරා විසින් හසුකරගන්නා ලද දුවද්දී දැවී යෑමද ඇතුළත් විය. කෙසේ වෙතත් පස්වැනි කඩුල්ලට එක් වුණු නායක ජොෂුවා ඩෝන් පන්දු 73 කදී ලකුණු 50 ක්ද බ්‍රෙන්ඩන් බූඩූ පන්දු 52 කදී ලකුණු 34 ක් වශයෙන් එම කඩුල්ලට 76 ක් රැස් කරමින් ජයග්‍රහණය සඳහා ප්‍රවේශය එක් කළහ.

කෙසේ වෙතත් ඔවුන් දෙදෙනා ලකුණු 02 ක් ඇතුළත දවා ගැනීමට චාමික හීනටිගල සහ රමිරු පෙරේරා සමත් වීමත් සමග නැවතත් තරගය දෙපිළටම විවෘත විය. කෙසේ වෙතත් 7 වැනි කඩුල්ලට එක් වුණු ජොනතන් වෑන් ලංග් (23) සහ ශකුආන් බෙලේ (41*) කොදෙව් කණ්ඩායම ජයග්‍රහණය කරා රැගෙන ගිය අතර බෙලේ ජය සනාථ වන තෙක්ම කඩුල්ල ආරක්ෂා කර ගත්තේය. පන්දු 31 කට මුහුණ දුන් බෙලේ රැස් කරන ලද ලකුණු 41 ට හතරේ පහර 2 ක් සහ හයේ පහර 3 ක් එල්ල කළේය.

මේ අතර පළමුව පන්දුවට පහර දුන් ශ්‍රී ලංකා යොවුන් කණ්ඩායම වෙනුවෙන් ආරම්භක පිතිකරුවන් වූ විරාන් චමුදිත(24) සහ දිමන්ත මහවිතාණ (34) එකතුව පළමු කඩුල්ල වෙනුවෙන් ලකුණු 48 ක සාර්ථක ආරම්භයක් එක් කළද මැද පෙළ සහ පසුපෙළ  පිතිකරුවන්ට ලකුණු අතරට පැමිණීමට නොහැකි වීම නිසා ශ්‍රී ලංකා යොවුන් ඉනිම ලකුණු 182 කට සීමා විය.

ආරම්භක පිතිකරුවන් හැරුණු කොට ගෙන ශ්‍රී ලංකා යොවුන් පිල වෙනුවෙන් ලකුණු 20 සීමාව ඉක්මවා යෑමට සමත්වූයේ නායක විමත් දින්සර (22) සහ චාමික හීනටිගල (21) පමණි. පිත්තට අමතරව පන්දු යැවීමෙන් කැපී පෙනුණු ශකුඑන් බෙලේ ලකුණු 35 කට කඩුලු 4 ක් දවාලූවේය.

ශ්‍රී ලංකා අවුරුදු 19 න් පහළ කණ්ඩායම පන්දුවාර 39.3 කදී සියලු දෙනා දැවී ලකුණු 182 යි – (දිමන්ත මහවිතාණ 34, විරාන් චමුදිත 24, සෙනුජ වෙකුණගොඩ 17, කවීජ ගමගේ 15, විමත් දින්සර 22, චාමික හීනටිගල 21, ආදම් හිල්මි 16, ශාකුඑන් බෙලේ 35/4, සැකර් කාටර් 34/2, බ්‍රෙන්ඩන් බුඩූ 01/2)

බටහිර ඉන්දීය කොදෙව් අවුරුදු 19 න් පහළ කණ්ඩායම පන්දුවාර 34.4 කදී කඩුලු 8 ක් දැවී ලකුණු 167 යි – (ජොෂුවා ඩ්‍රෝර්න් 50, බ්‍රෙන්ඩන් බූඩූ 34, ජොනතන් වෑන් ලංග් 23, ශකුඑන් බෙලේ 41*, සෙත්මික සෙනෙවිරත්න 22/2, කුගදාස් මාතුලන් 45/2, විරාන් චමුදිත 47/1, චාමික හීනටිගල 21/1, රමිරු පෙරේරා 13/1)