ශ්‍රී ලංකා ක්‍රිකට් ආයතනයේ සංවිධානයෙන් සහ ප්‍රීමා ආයතනයේ අනුග්‍රහයෙන් පැවැත්වෙන වයස අවුරුදු 15න් පහළ ශ්‍රී ලංකා යූත් ලීග් පළාත් ක්‍රිකට් තරගාවලියේ සිව්වැනි දිනය වූ අද (23දා) පැවැති තරගයකදී කොළඹ දකුණ ක්‍රීඩකයෝ පිට පිට තෙවැනි ජය වාර්තා කරමින් දඹුල්ල පිල කඩුලු 8කින් පරාජය කිරීමට සමත් වූහ.

කොළඹ මැලේ ක්‍රීඩාංගණයේ පැවැති තරගයේ කාසියේ වාසිය දිනාගත් දඹුල්ල පිල මුලින් පන්දුවට පහරදීමට තීරණය කොට ලකුණු 86කට දැවීගිය අතර, පසුගිය වසරේ 15න් පහළ ශූර ‍කොළඹ දකුණ පිල කඩුලු 2ක් දැවී එම ඉලක්කය සම්පූර්ණ කළේය.

පන්දු 23කදී හයේ පහර 6ක් හා හතරේ පහරක් සමඟ වේගවත් ලකුණු 46ක් ලබාගත් මියුර බණ්ඩාර කැපී පෙනෙන පිතිකරණයක නිරත වූ අතර, සවීන් ගමගේ සමඟ එක්ව ‍දවැනි කඩුල්ලට පන්දු 38කදී ලකුණු 50ක සබඳතාවක් ද ගොඩනැගීය. ඔහු තෙවැනි කඩුල්ලට මෙතුක ගුණරත්න සමඟ එක්ව පන්දු 16කදී ලකුණු 24ක් එක් කිරීමට සමත් වූවේය.

දඹුල්ල පිල අඩු ලකුණු ගණනකට සීමා කිරීමට කොළඹ දකුණ පිලේ ආරම්භක පන්දු යැවු හමීඩ් හෆ්ඩාල් මුල සිටම කටයුතු කළ අතර, ඔහු ලකුණු 19කට කඩුලු 4ක් බිදහෙලීමට සමත් විය. අනෙක් අන්තයෙන් පන්දු යැවූ ඉමේෂ් චතුරංග ද සිල්වා ලකුණු 25කට කඩුලු 3ක් හා නවිනු ප්‍රනාන්දු කඩුලු 2ක් බිදහෙලීමට සමත් විය.

දඹුල්ල පිලේ මුල් කඩුලු 4ක් ලකුණු 12කට දැවී ගිය අතර, 5 වැනි කඩුල්ලට මනූජ ජයසිංහ හා රසිඳු ආකර්ෂා පන්දු 22කදී ලකුණු 14ක් එක් කළහ. අනතුරුව හොඳම සබඳතාව වූයේ පබසර වනසිංහ හා නෙසාද් වීරසේකර අතර 8 වැනි කඩුල්ලට පන්දු 38කදී ගොඩනැගුණු ලකුණු 38ක සබඳතාව වේ. අංක 9 පිතිකරු ලෙස පිටියට පිවිසි පබසර වනසිංහ පන්දු 24 කදී හයේ 3ක් හා හතරේ 3ක් සමඟ ලකුණු 36ක් ලබා ගත්තේය.

දඹුල්ල පිල ඕවර් 29.3කදී සියලු දෙනා දැවී ලකුණු 86

රසිඳු ආකර්ෂා 7, ගිම්හාන් මිකෙල් 9, විතුන් රත්නකුමාර 7, පබසර වනසිංහ 36, අතිරේක 11 (හමීඩ් හෆ්ඩාල් 19/4, ඉමේෂ් චතුරංග ද සිල්වා ලකුණු 25/3,  නවිනු ප්‍රනාන්දු 15/2, දෙනුවන් සතිෂ් 20/1)

කොළඹ දකුණු පිල ඕවර් 9.5කදී කඩුලු 2ක් දැවී ලකුණු 90

මියුර බණ්ඩාර 46, සවීන් ගමගේ 11, මෙතුක ගුණරත්න නොදැවී 18, මෙනුක දිසානායක නොදැවී 5, අතිරේක 10 (යුමාල් එගොඩගේ 6/1, රසිඳු ආකර්ෂා 13/1)