ශ්‍රී ලංකා ක්‍රිකට් ආයතනයේ සංවිධානයෙන් සහ ප්‍රීමා ආයතනයේ අනුග්‍රහයෙන් පැවැත්වෙන වයස අවුරුදු 15න් පහළ නැෂනල් යූත් ලීග් පළාත් ක්‍රිකට් තරගාවලියේ දෙවැනි දිනය වූ අද (20 දා) දිනයේ පැවැති තරගයකදී දඹුල්ල කණ්ඩායමට එරෙහිව ලකුණු 64 ක ජයක් වාර්තා කර ගැනීමට මහනුවර කණ්ඩායම සමත්විය. මෙවර තරගාවලිය යටතේ සහභාගිවූ පළමු තරගයේදීම ජය වාර්තා කිරීමට මහනුවර කණ්ඩායම සමත්වීම කැපී පෙනෙයි. 

කොළඹ තර්ස්ටන් විදුහල් ක්‍රීඩාංගණයේදී පැවැති මෙම තරගයේ කාසියේ වාසිය දිනාගත් මහනුවර ක්‍රීඩක‍යෝ මුලින් පන්දුවට පහරදී ඕවර් 38.2කදී සියලු දෙනා දැවී ලකුණු 129ක් ලබාගත් අතර, පිළිතුරු ඉනිම ක්‍රීඩා කළ දඹුල්ල පිල ඕවර් 21.5කදී සියලු දෙනා ලකුණු 65කට දැවී ගියහ.

මහනුවර පිලේ දඟ පන්දු යවන යොවුන් ක්‍රීඩක සතිර ‍දෙනුවන් ජයග්‍රහණයේ නියමුවා ‍වෙමින් ලකුණු 8කට දඹුල්ල පිලේ කඩුලු 5ක් බිදහෙළූ අතර, ඔහු යැවූ ඉනිමේ 15 වැනි ඕවර‍යේදී කඩුලු 3ක් බිද‍හෙලීමෙන් දඹුල්ල පිලේ කඩා වැටීම දරුණු අතකට ‍පෙරලී ගියේය.

එක් අවස්ථාවකදී දඹුල්ල පිල කඩුලු 5කට ලකුණු 34ක් වූ අතර, සතිර ‍දෙනුවන්ගේ පන්දු යැවීම හමුවේ ලකුණු පුවරුව කඩුලු 8කට ලකුණු 38ක් ලෙස ක්ෂණිකව පරිවර්තනය වුවේය. අවසන් කඩුලු දෙක ලකුණු 14කදි බිදහෙලා ගත් මහනුවර ක්‍රීඩකයෝ මෙවර තරගාවලියේ පළමු ජය සටහන් කළහ.

කොළඹ උතුර පිලට එරෙහි පළමු තරගයේදී ශතකයක් ලබාගත්  දඹුල්ල පිලේ ආරම්භක පිතිකරු දිසස් බණ්ඩාර අද වැඩිම ලකුණු ලබාගත් පිතිකරු ‍වෙමින් ලකුණු 16කට දැවී ගිය පසු අනෙක් පිතිකරුවන්ට සාර්ථක ලෙස ලකුණු අතරට පැමිණීමට නොහැකි වූහ.

මහනුවර පිල පන්දුවට පහර දෙද්දී දඹුල්ල පිලේ යුමාල් එගොඩගේ ලකුණු 30කට කඩුලු 5ක් බිදහෙලා දස්කම් දැක්වුවද එය ජයග්‍රහණයට ප්‍රමාණවත් නොවුණි. සවිත විතානගේ ලකුණු 27ක් ලබාගත් අතර, සනිරු අනුහස් සමඟ එක්ව 5 වැනි කඩුල්ලට පන්දු 62කදී ලකුණු 37ක සබඳතාවක් ගොඩනැගූහ.

මහනුවර පිල ඕවර් 38.2කදී සියලු දෙනා දැවී ලකුණු 129

රන්දිදු නාරායන 11, උසුල උදාකර 12, සවිත විතානගේ 27, සනිරු අනුහස් 18, ලකිඳු මෙවුල් නොදැවී 17, තිනුල්ක රාජපක්ෂ 11, අතිරේක 13 (පබසර වනසිංහ 21/2, යුමාල් එගොඩගේ 30/5, තරුක්ෂ ද සිල්වා 10/1, සිතිජ ‍නෙත්සර 33/1)

දඹුල්ල පිල ඕවර් 21.5කදී සියලු දෙනා දැවී ලකුණු 65

දිසස් බණ්ඩාර 16, රසිඳු අකර්ෂා 15, විතුන් රත්නකුමාර නොදැවී 14, අතිරේක 7 (සතිර දෙනුවන් 8/5, තිනුල්ක රාජපක්ෂ 20/3, තරුෂ නිමන්ත 7/1, සසිත් බණ්ඩාර 22/1)