කුසලතා පිරි යොවුන් ක්‍රිකට් ක්‍රීඩකයින්ගේ දක්ෂතා ගවේෂණය කර ගැනීමේ අරමුණින් ශ්‍රී ලංකා ක්‍රිකට් ආයතනයේ සංවිධානයෙන් සහ ප්‍රීමා ආයතනයේ අනුග්‍රහයෙන් පැවැත්වෙන වයස අවුරුදු 15න් පහළ ශ්‍රී ලංකා යූත් ලීග් පළාත් ක්‍රිකට් තරගාවලියේ අද (22 දා) පැවැති කොළඹ උතුර කණ්ඩායම හා ගාල්ල අතර තරගයෙන් ගාල්ල පිලට ලකුණු 65ක ජයක් අත්විය.

කොළඹ වෙළද සේවා ක්‍රිකට් පිටියේ පැවැති තරගයේ කාසියේ වාසිය දිනාගත්  කොළඹ උතුර පිල මුලින් පන්දුවට පහරදීමට ගාල්ල පිලට ආරාධනා කළ හෙයින් ගාලු ක්‍රිඩකයෝ පිල ඕවර් 50 කදී කඩුලු 8ක් දැවී ලකුණු 212ක් ලබා ගත්තේය. පිළිතුරු ඉනිම ක්‍රීඩා කළ කොළඹ උතුර කණ්ඩායම ඕවර් 50කදී කඩුලු 9ක් දැවී ලකුණු 147කට සීමා කිරීමට ගාලු පිල සමත් වූවේය.

කොළඹ උතුර කණ්ඩායමට එරෙහි තර්ජනාත්මක පන්දු යෑවීමක නිරත වූ ගෙසඳු බයිසාස් ඕවර් 8ක් යවා ලකුණු 34කට කඩුලු 2ක් හා හිරුක අකලංක ඕවර් 9ක් යවා ලකුණු 18කට කඩුලු 2ක් බිදහෙලීමට සමත් වූහ.

කොළඹ කණ්ඩායමේ පළමු කඩුලු හතර ලකුණු 77කට බිදහෙලීමට ගාල්ල පිල සමත්වූ අතර, පස්වැනි කඩුල්ලට පන්දු 34කදී ලකුණු 26ක් එක්කිරීමට හෆීස් ජුන්කීර් හා සෙහඳු සමරවීර සමත්වූ අතර, අටවැනි කඩුල්ලට පන්දු 67කදී ලකුණු 32ක් සටන්කාමී සබඳතාවක් ගොඩනැඟීමට අබ්දූල් රහ්මාන් හා සෙනුක් නිලේෂ් සමත් වුවද, ලකුණු වේගය ප්‍රමාණවත් නොවුණි.

මෙවර තරගාවලියේ දැනට කණ්ඩායමක් රැස්කළ වැඩිම ලකුණු එකතුවට හිමිකම් කියූ ගාල්ල කණ්ඩායමේ ලිනුවර සත්විඳු පන්දු 45කදී හයේ 2ක් හා හතරේ පහර 2ක් සමඟ නොදැවී ලකුණු 38ක් ලබාගත් අතර, මොහොමඩ් ෂිහාබ් හා දියත් සන්ජිත හතරවැනි කඩුල්ලට පන්දු 80කදී ලකුණු 50ක් සබඳතාවක් ගොඩනැඟීමට සමත් වූහ. මොහොමඩ් ෂිහාබ් ලකුණු 35ක් හා දියත් සන්ජිත ලකුණු 29ක් ලබා ලකුණු පුවරුව ඉහළට එසැවූහ.

මෙම ජයග්‍රහණය ගාල්ල පිල මෙවර තරගවාරයේ ලබාගත් පළමු ජයග්‍රහණය විය.

ගාල්ල පිල ඕවර් 50කදී කඩුලු 8කට ලකුණු 212

නිසිත් තේජව ද සිල්වා 14, හිරුන් මතීෂ 13, දියත් සන්ජිත 29, මොහොමඩ් ෂිහාබ් 35, ගෙසඳු බයිසාස් 20, ලිනුවර සත්විඳු නොදැවී 38, හිරුක් අකලංක 17, ගයූක කවිෂ්ක නොදැවී 15 අතිරේක 25 (දෙසඳු දින්සර 43/2, අබ්දූල් රහුමාන් 17/3, සදීෂ කාවින්ද 55/1, සෙනුක් නිලේෂ් 27/1)

කොළඹ උතුර පිල ඕවර් 50කදී කඩුලු 9කට ලකුණු 147

ජනදීප ඔකාෂ් 27, ගිත්ම ඉමදිත් 13, චේතින කාවින්ද 24, හෆීස් ජුන්කීර් 21, ‍සෙහඳු සමරවීර 10, ෂෙනුක් නිලේෂ් 14, අබ්දුල් රහුමාන් 19, අතිරේක 9 (ගෙසඳු බයිසාස් 34/2,  හිරුක් අකලංක 18/2, චෙනුල් මනිල්ක 19/1, ගයූක කවිෂ්ක 26/1, කවීෂ ගයාෂාන් 28/1)